(එෆ්.අස්ලම්)

ප්‍රසිද්ධ නීතීඥවරයකුගේ අකටයුත්තක් ගැන ජනපති අගමැති ඇතුළු රටේ වගකිව යුතු පාර්ශවයන් 20කට පැමිණිලි කළත් ඒ සම්බන්ධයෙන් කිසිදු විමර්ශනයක් කිසිදු පාර්ශවයක් සිදුනොකිරීම පිළිබඳව ඇමෙරිකාවේ රැකියාවක් කරමින් ශ්‍රී ලංකා රජයට බදුගෙවන පුද්ගලයකු ලෙස තමන් කණගාටු වන බව මාලන් මෙන්ඩිස් මහතා පවසයි.

තමන්ට සිදුවූ අකටයුත්ත සම්බන්ධයෙන් රාජ්‍ය අමාත්‍ය රංජන් රාමනායක මහතාට පැමිණිලි කිරීමෙන් පසු ඒ මහතා තමන් මෙරටට කැදවා තමාගේ ගැටලුව ගැන සොයා බැලූ බවද හෙතෙම කියා සිටියේය‍.ඒ මහතා මේ බව සදහන් කර සිටියේ රාජ්‍ය අමාත්‍ය රංජන් රාමනායක මහතාගේ ප්‍රධානත්වයෙන් ඒ මහතාගේ නිවසේදි ඊයේ(12) පැවති මාධ්‍ය හමුවකදීය‍

එහිදී වැඩිදුරටත් අදහස් දැක්වූ මාලන් මෙන්ඩිස් මහතා මෙසේද කීය.

"තමන්ට පමණක් ප්‍රාණ භුක්තිය තබාගෙන 2011 අගෝස්තු මස 17 වැනිදා තම පුතුට පවරන ලද ඉඩමක ඔප්පුවකට මහනුවර ප්‍රදේශයේ ප්‍රසිද්ධ නීතිඥවරයකු මෙන්ම නොතාරිස්වරයකු විසින් වෙනත් කාන්තාවකගේ නමක් ඇතුළත් කිරීමෙන් අකටයුත්තක් සිදුකරලා තියෙනවා.

මේ සම්බන්ධයෙන් මම එම  නීතිඥවරයාගෙන් විමසන අවස්ථාවේ ඔහු අතින් එවැනි වරදක් සිදුවූ බවත් ඊට සමාව අයදින ලෙසත් ඉල්ලා ඊමේල් පණිවුඩයක් එව්වා. එම තොරතුරු පදනම් කරගෙන මා විසින් පොලිසියට සහ ශ්‍රී ලංකා නීතිඥ සංගමයට පැමිණිල්ලක් ඉදිරිපත් 2016 වසරේදී සිදුකළා.

මේ ගැන  ශ්‍රීලංකා නීතිඥ සංගමයටත් පැමිණිලි කළා. අදාළ නීතිඥවරයාව විමර්ශනයක් සඳහා 17 වතාවක් නීතීඥ සංගමය වෙත කැඳවා තිබුණත් එකදු විමර්ශනයකට හෝ එම නීතිඥවරයා පෙනී සිට නැහැ. පොලිසියද මේ පිළිබද විමර්ශනයක් සිදුකරල නැහැ.

අවසාන වශයෙන් 2019 ජූලි 16 වැනිදා ජනාධිපති, අගමැති, අධිකරණ ඇමති, අගවිනිසුරු,නීතිපති,පොලිස්පති ඇතුළු 20 දෙනෙකුට මේ පිළිබඳ ලිඛිතව දැනුම් දුන්නා. ඒත් ඒ කිසිම පාර්ශවයක් මේ පිළිබඳ මෙතෙක් විමසීමක් හෝ සිදුකළේ නැහැ. මේ ගැන විමසීමක් සිදුකලේ රාජ්‍ය අමාත්‍ය රංජන් රාමනායක මහතා පමණයි.

මේ  සම්බන්ධව තමන් තොරතුරු දැනගැනීමේ පනත යටතේ නීතිඥ සංගමයෙන් ඉල්ලා සිටියත් ඒ සංගමය විසින් මා ඉල්ලන ලද තොරතුරු වලට පිළිතුරු දිය නොහැකි බව සදහන් කර එවා තිබුණා.

මේ සම්බන්ධයෙන් නීතිය ක්‍රියාත්මක කර අදාළ නීතිඥවරයා පිළිබඳ පියවරක් ගන්නා ලෙසත් තමන්ට සිදුවූ අසාධාරණය නිවැරදි කරදෙන ලෙසත් ඉල්ලා සිටිනවා" යැයි ද මාලන් මෙන්ඩිස් මහතා සඳහන් කළේය.