(අංජුල මහික වීරරත්න)
 
දිවයින පුරා නැණසල මධ්‍යස්ථාන 10,000ක් පිහිටුවා ඇතත්  ඒවායින් බොහොමයක් මේ වනවිට අක්‍රීය තත්ත්වයේ පවතින බවද නැණසල ව්‍යාපෘතිය නව මුහුණුවරකින් ඵලදායී ලෙස ක්‍රියාත්මක කිරීම තම අරමුණ බවද ඩිජිටල් යටිතල පහසුකම් සහ තොරතුරු තාක්ෂණ අමාත්‍ය අජිත් පී. පෙරේරා මහතා පැවැසීය.
 
2005 වසරේදී ආරම්භ කරන ලද නැණසල ව්‍යාපෘතිය යටතේ පිහිටවූ මධ්‍යස්ථාන ගණනාවක් මේ වනවිට අක්‍රීය තත්ත්වයේ පවතින බවට අමාත්‍යංශයට වාර්තා වී තිබෙන බවද අජිත්. පී. පෙරේරා මහතා සඳහන් කළේය.
 
අමාත්‍යවරයා මේ බව කීවේ නැණසල ජාතික සංසදයේ නියෝජිතයන් සමඟ කොල්ලුපිටියේ එම අමාත්‍යාංශයේ පැවැති සාකච්ඡාවේදීය.
 
නැණසල ජාතික සංසදය මගින් අදාළ ව්‍යාපෘතිය සාර්ථක කරගැනීම සඳහා ඉදිරිපත් කරන ලද යෝජනා 14කින් යුතු යෝජනාවලියක්ද මෙහිදී අමාත්‍යවරයාට භාරදුන්නේය.
 
නව ව්‍යාපෘතිය සඳහා නැණසල ජාතික සංසදයේ නියෝජිතයන් හත්දෙනෙකුගෙන් යුතු කමිටුවක්ද පත්කෙරුණු අතර අමාත්‍යංශය, අයි. සී.ටී. ඒ. ආයතනය සමඟ කඩිනමින් ඉදිරි වැඩ පිළිවෙළ ක්‍රියාවට නැංවිය යුතු බවට අමාත්‍යවරයා නිලධාරීන්ට උපදෙස් දුන්නේය.