(තිළිණි ද සිල්වා)
 
සිය නීතීඥභාවය වසර තුනක කාලයකට අත්හිටුවමින් නියෝගයක් නිකුත් කළ හිටපු අගවිනිසුරු නලින් පෙරේරා මහතා ඇතුළු ශ්‍රේෂ්ඨාධිකරණ විනිසුරු මඩුල්ලෙන් රුපියල් මිලියන 100ක් බැගින් වන්දි අයකර දෙන ලෙස ඉල්ලා නාගානන්ද කොඩිතුවක්කු මහතා ගොනු කර තිබූ  පෙත්සමක් විභාගයට නොගෙන ප‍්‍රතික්ෂේප කිරීමට කොළඹ මහාධිකරණය අද (09) තීන්දු කළේය.
 
කොළඹ මහාධිකරණ විනිසුරු ගිහාන් කුලතුංග මහතා විසින් මෙම නියෝගය ලබා දෙන ලදී.
 
පෙත්සම කොළඹ මහාධිකරණ විනිසුරු ගිහාන් කුලතුංග මහතා ඉදිරි කැඳවූ අවස්ථාවේදී මූලික විරෝධතා මතු කළ නීතිපතිවරයා වෙනුවෙන් පෙනීසිටි අතිරේක සොලිසිටර් ජනරාල් ෆර්සානා ජමීල් මහත්මිය ඉදිරිපත් කළ මූලික විරෝධතාවය පිළි ගනිමින් පෙත්සම ප‍්‍රතික්ෂේප කරන ලදී.
 
හිටපු අගවිනිසුරුවරයා ප‍්‍රමුඛ ශ්‍රේෂ්ඨාධිකරණ විනිසුරු මඩුල්ල එම නියෝගය ලබා දී ඇත්තේ පෙත්සම්කරුට එරෙහිව ලැබුණු පැමිණිල්ලක් සම්බන්ධයෙන් සාක්ෂි කැඳවා විභාගයක් පැවැත්වීමෙන් අනතුරුව බවත්  එලෙස ලබා දුන් නියෝගයකට එරෙහිව නඩුවක් පැවරීමේ නීතිමය අයිතියක් නොමැති බවත් අතිරේක සොලිසිටර් ජනරාල් ෆර්සානා ජමීල් මහත්මිය සිය මූලික විරෝධතාව ඉදිරිපත් කරමින් කියා සිටියාය.
 
එකී නියෝගය අධිකරණ සංවිධාන පනත යටතේ අධිකරණ විනිසුරුවරුන්ට ලබා දී ඇති නෛතික බලතල ප‍්‍රකාරව නිකුත් කළ රාජකාරීමය නියෝගයක් බවත් කුමන පනතකින් හෝ එකී නියෝගය අභියෝගයට ලක් කිරීමේ අයිතියක් පෙත්සම්කරුට නොමැති බවත් අතිරේක සොලිසිටර් ජනරාල්වරියා අධිකරණය හමුවේ වැඩිදුරටත් පැවසුවාය.

එම මූලික විරෝධතාව පිළිගත් මහාධිකරණ විනිසුරු ගිහාන් කුලතුංග මහතා මෙම පෙත්සම විභාග කිරීමට අධිකරණයට බලයක් නොමැති බව සඳහන් කරමින් එය ප‍්‍රතික්ෂේප කිරීමට තීන්දු කළේය.
 
වසර තුනකට නීතිඥභාවය තහනමකට ලක් වී සිටින නීතිඥ නාගානන්ද කොඩිතුවක්කු මහතා විසින් පෙත්සම ඉදිරිපත් කර තිබූ මෙම පෙත්සමේ වගඋත්තරකරුවන් ලෙස  හිටපු අගවිනිසුරු නලීන් පෙරේරා, විජිත් මළල්ගොඩ, සිසිර ද ආබෲ, ප‍්‍රසන්න ජයවර්ධන යන ශ්‍රේෂ්ඨාධිකරණ විනිසුරුවරුන් සහ නීතිපතිවරයා නම් කර තිබුණි.
 
නාගනන්ද කොඩිතුවක්කු මහතා අධිකරණය හමුවේ කියා තිබුණේ වගඋත්තරකාර විනිසුරුවරු සිය බලය අවභාවිතයට ලක් කරමින් තම නීතිඥ භාවය වසර 3කට තහනම් කිරීමට කටයුතු කළ බවයි.
 
ඒ තුළින් වගඋත්තරකරුවන් එක්සත් ජාතීන්ගේ සිවිල් හා දේශපාලන අයිතිවාසිකම් පිළිබඳව ප‍්‍රඥප්ති පනත යටතේ වරදක් සිදුකර ඇති බැවින්  හිටපු අගවිනිසුරු නලින් පෙරේරා මහතා ඇතුළු ශ්‍රේෂ්ඨාධිකරණ විනිසුරු මඩුල්ලෙන් රුපියල් මිලියන 100ක් බැගින් වන්දි අයකර දෙන ලෙස ඉල්ලා නාගනන්ද කොඩිතුවක්කු මහතා සිය පෙත්සමෙන් ඉල්ලා තිබිණි.