(ඩයනා උදයංගනී)

දුෂ්කර ප්‍රදේශයන්හි පිහිටි පිරිවෙන්වල ඉගෙනුම ලබන භික්ෂූන් වහන්සේලා, සිල් මාතාවන් සහ ගිහි සිසුන් වෙනුවෙන් ශිෂ්‍යත්ව, පරිගණක යන්ත්‍ර, අධ්‍යාපනික උපකරණ සහ පාවහන් තිලිණ පත් ප්‍රදානය කිරීම ජනාධිපති ගෝඨාභය රාජපක්ෂ මාහතගේ ප්‍රධානත්වයෙන් අද (30) ආරම්භ විය.

මේ යටතේ මොණරාගල, බදුල්ල, අනුරාධපුරය, පොළොන්නරුව, කෑගල්ල, රත්නපුරය, වවුනියාව, මුලතිව්, මඩකළපුව, අම්පාර, ත්‍රිකුණාමලය සහ හම්බන්තොට යන දිස්ත්‍රික්කයන්හි දුෂ්කර ප්‍රදේශවල පිහිටි පිරිවෙන්වල ඉගෙනුම ලබන සියලුම ගිහි - පැවිදි සිසුන්ට අවශ්‍ය අධ්‍යාපනික උපකරණ ප්‍රදානය කෙරෙන අතර දහම් පාසල්, පිරිවෙන් හා භික්ෂු අධ්‍යාපන රාජ්‍ය අමාත්‍යාංශය ඒ සඳහා වෙන් කර ඇති මුදල රුපියල් කෝටි 3කි.

මෙහි සමාරම්භය සනිටුහන් කරමින් සංකේතාත්මකව ශිෂ්‍යත්ව සහ අධ්‍යාපනික උපකරණ පිරිනැමීම ජනාධිපති ගෝඨාභය රාජපක්ෂ මහතා අතින් අද (30) පෙරවරුවේ අරලියගහ මැදුරේ දී සිදුකෙරිණි.

මූලික පිරිවෙන් අවසාන පරික්ෂණයෙන් සහ ප්‍රාචීන ප්‍රාරාම්භ පරීක්ෂණයෙන් ඉහළම ලකුණු ලබාගත් ශිෂ්‍ය භික්ෂූන් වහන්සේ විසිනමකට විදේශ ශිෂ්‍යත්ව ප්‍රදානය ද මෙහිදී සිදු විය.

මෙම වැඩසටහන යටතේ පිරිවෙන් සඳහා රුපියල් මිලියන 12ක සෞන්දර්යය උපකරණ කට්ටල බෙදා දීම ද සිදු කෙරේ.

දහම් පාසල්, පිරිවෙන් හා භික්ෂු අධ්‍යාපන රාජ්‍ය අමාත්‍යාංශයේ www.piriven.gov.lk නිල වෙබ් අඩවිය එළිදැක්වීම ද ජනාධිපතිවරයා අතින් මෙහිදී සිදු කෙරිණ.

පිරිවෙන් අධ්‍යක්ෂ වටිනාපහ සෝමානන්ද හිමි, බලංගොඩ සෝභිත හිමි, නාරම්පනාවේ ආනන්ද හිමි, ආචාර්ය බෝදාගම චන්දිම හිමි ඇතුළු මහා සංඝරත්නය සහ අධ්‍යාපන අමාත්‍ය මහාචාර්ය ජී.එල් පීරිස්, රාජ්‍ය අමාත්‍යවරුන් වන විජිත බේරුගොඩ, සුසිල් ප්‍රේමජයන්ත්, පියල් නිශාන්ත, විදුර වික්‍රමනායක සහ සීතා අරඹේපොල යන මහත්ම මහත්මීහු ඇතුළු පිරිසක් මෙම අවස්ථාවට එක්ව සිටියහ.