(එෆ්.අස්ලම්)
 
ඉදිරි ජනාධිපතිවරණය සම්බන්ධයෙන් එක්සත් ජාතික පක්ෂයේ නායක අග්‍රාමාත්‍ය රනිල් වික්‍රමසිංහ මහතා සහ දෙමළ ජාතික සන්ධානය අතර විශේෂ සාකච්ඡාවක් හෙට (17) පාර්ලිමේන්තු සංකීර්ණයේදී පැවැත්වීමට නියමිතව ඇතැයි දෙමළ සන්ධානයේ ආරංචි මාර්ග සදහන් කරයි.

මෙම සාකච්ඡාවෙන් අනතුරුව එක්සත් ජාතික පක්ෂයේ නියෝජ්‍ය නායක සජිත් ප්‍රේමදාස මහතාද හමුවී සාකච්ඡා කිරීමටද එම සන්ධානය තීරණය කර තිබේ.

ඉදිරි ජනාධිපතිවරණය සම්බන්ධයෙන් දෙමළ ජාතික සන්ධානයේ නායකත්වය ප්‍රමුඛ පාර්ලිමේන්තු කණ්ඩායම එක්සත් ජාතික් පක්ෂයේ නියෝජ්‍ය නායක අමාත්‍ය සජිත් ප්‍රේමදාස මහතා සමගින් ඊයේ(15) සාකච්ඡාවක් පැවැත්වීමට සූදානම් කර තිබුණද එම සාකච්ඡාව කල්දමා තිබේ. 

සජිත් ප්‍රේමදාස මහතා හමුවීමට පෙර රනිල් වික්‍රමසිංහ මහතා හමුවී සාකච්ඡා කළ යුතු බවට දෙමළ ජාතික සන්ධානයේ නියෝජිතයින් තීරණය කිරීම මත එම සාකච්ඡාව කල්දැමීමට සිදුවූ බව දෙමළ ජාතික සන්ධාන පාර්ලිමේන්තු මන්ත්‍රීවරයෙක් සඳහන් කළේය.

මේ  අතර මලික් සමරවික්‍රම, මංගල සමරවීර සහ රාජිත සේනාරත්න යන අමාත්‍යවරුන් සහ දෙමළ ජාතික සන්ධානයේ නායක ආර්.සම්බන්ධන් පාර්ලිමේන්තු මන්ත්‍රී එම්.ඒ.සුමන්තිරන් යන මහත්වරුන් අතර හමුවක්ද ඊයේ(15) සිදුව ඇතැයි දේශපාලන ආරංචිමාර්ග සඳහන් කරයි.

මෙවර ජනාධිපතිවරණයට ඉදිරිපත්වන සියලු පාර්ශව සමගින් දෙමළ ජාතික සන්ධානය සාකච්ඡා කරන බවත් දෙමළ ජනතාවගේ අයිතිවාසිකම් හා ගැටළුවලට විසඳුම් දෙන බවට සහතික වන නායකයාට සහාය ලබා දෙන බවත් දෙමළ ජාතික සන්ධානයේ නායක ආර්.සම්බන්ධන් මහතා දෙමළ මාධ්‍ය වෙත අදහස් දක්වමින් සඳහන් කර තිබිණි.