( තිළිණි ද සිල්වා  සහ  රංජන් කටුගම්පොළ )

පාස්කුදා ප‍්‍රහාරයෙන් දරු දෙදෙනා අහිමි වූ පියෙකු ගොනු කර තිබූ මූලික අයිතිවාසිකම් පෙත්සම මෙම මස 21 වැනි දින මේ සම්බන්ධ අනෙකුත් පෙත්සම් දෙක සමඟ කැඳවන ලෙස ශ්‍රේෂ්ඨාධිකරණය අද (08)  නියෝග කළේය.
 
බුද්ධි අංශ මඟින් දැනුම්වත් කර තිබියදීත් සිදුවූ ප‍්‍රහාරය මඟින් මිනිස් ජීවිත අහිමි වූයේ පොලිස්පති ඇතුළු වගඋත්තරකරුවන් නිසි රාජකාරී යුතුකම් පැහැරහැරීම හේතුවෙන් බව සඳහන් කරමින් ඔවුන්ට එරෙහිව අපරාධ නඩුවක් ගොනු කරන ලෙස ඉල්ලා මෙම පෙත්සම ගොනු කර තිබිණි.
 
මෙම පෙත්සමෙහි වග උත්තරකාර පොලිස්පති සහ හිටපු ආරක්ෂක ලේකම්වරයාට නොතීසි බාර දෙන ලෙසද අධිකරණය පෙත්සම්කරුට නියෝග කළේය.
 
ප‍්‍රසන්න ජයවර්ධන , මුර්දු ප‍්‍රනාන්දු සහ ගාමිණී අමරසේකර යන මහත්ම මහත්මීන්ගෙන් සමන්විත ශ්‍රේෂ්ඨාධිකරණය විනිසුරු මඩුල්ල හමුවේ පෙත්සම සලකා බැලිණි.
 
වැල්ලම්පිටිය සමන් නන්දන තිරිමාන්න මහතා විසින් ගොනු කරනු ලැබු මෙම පෙත්සමෙහි වගඋත්තරකරුවන් වශයෙන් පොලිස්පති පූජිත ජයසුන්දර , හිටපු ආරක්ෂක ලේකම් හේමසිරි ප‍්‍රනාන්දු සහ නියෝජ්‍ය පොලිස්පති ශ්‍රී ලාල් දිසානායක සහ නීතිපති නම් කරනු ලැබ සිටිති.
 
පෙත්සමේ මෙසේද සඳහන් වේ.
 
පළමු පෙත්සම්කරු බෞද්ධයෙකි.ඔහුගේ දරු දෙදෙනාගේ අධ්‍යාපන කටයුතු සාර්ථක වීම සඳහා කොච්චිකඬේ පල්ලියේ පූජාවට සහභාගී වූහ.ඒ අතර බෝම්බ ප‍්‍රහාරයට ලක්වීමෙන් දරුවන් දෙදෙනා මරණයට පත්විය .
 
මෙම තත්ත්වය පිළිබඳන බුද්ධි අංශ මඟින් පූර්ව දැනුම් දීමක් දී තිබියදීත් වගඋත්තරකරුවන් පියවර නොගැනීමෙන් අපරාධ නඩු විධාන සංග‍්‍රහය සහ දණ්ඩ නීති සංග‍්‍රහය යටතේ අපරාධමය වරදක් සිදු කර ඇත.
 
එබැවින් වගඋත්තරකරුවන්ට එරෙහිව අපරාධමය නඩුවක් පැවරීමට නීතිපතිවරයාට නියෝග කරන ලෙස පෙත්සම්කරුවන් දෙදෙනා සිය පෙත්සම් වලින් ඉල්ලා සිටිති.