(ඉන්දිකා රාමනායක සහ බිමල් ශ්‍යාමන් ජයසිංහ)

කොළඹ 7 , සී ඩබ්ලිව්.ඩබ්ලිව් කන්නන්ගර මාවතේ පිහිටි තායිලන්ත තානාපති කාර්‍යාලයට අයත් රුපියල් කෝටි 50 කට අධික ඉඩමක් ව්‍යාජ ඇටෝර්නි බලපත්‍ර සහ ව්‍යාජ ඔප්පුවක් සකසා වෙනත් පුද්ගලයකුට අලෙවි කිරීමේ සිද්ධියක් සම්බන්ධයෙන් නීතිඥවරයෙක් අපරාධ පරීක්ෂණ දෙපාර්තමේන්තුව විසින් අත්අඩංගුවට ගනු ලැබීය.

මෙම ව්‍යාජ ඇටෝර්නි බලපත්‍රය සහ ඔප්පුව සකස් කිරීම සම්බන්ධයෙන් මෙම නීතිඥවරයා  අත්අඩංගුවට ගෙන ඇත.

මෙම ඉඩම ව්‍යාජ ඔප්පු සකසා වෙනත් පුද්ගලයකුට අලෙවි කිරීම සහ එම ඉඩම මිලදී ගත් පුද්ගලන් දෙදෙනා මීට පෙර අපරාධ පරීක්ෂණ දෙපාර්තමේන්තුව මගින් අත්අඩංගුවට ගෙන තිබිණි.

කූට ලේඛන සැකසීම , එයට ආධාර අනුබලදීම , සහ නොතාරිස් ආඥා පනත අවභාවිතා කිරීම යන කරුණු අනුව මෙම නීතිඥවරයා අධිකරණයට ඉදිරිපත් කිරීමට නියමිතව ඇත.