(ආණමඩුව හිරාන් ප්‍රියංකර ජයසිංහ)

තබ්බෝව ජලාශයට ආසන්නයේ පිහිටි ‍පැරණි අයියනායක දේවාලයේ ඇති  අයියනායක දේව ප්‍රතිමාවට පළඳා තිබූ රන් මාලය අද (21) කිසිවකු විසින් සොරා ගෙන ගොස් ඇති බව ජනතාව පවසයි.

තබ්බෝව ජලාශය ආසන්නයේ පිහිටි මෙම අයියනායක දේවාලය තුළ වසර 10 කට ප්‍රථම අයියනායක ගම්බාර දෙවියන්ගේ දේව ප්‍රථිමාවක් ඉදි කර එහි ආරක්ෂාවට වීදුරු කුටියක්ද සකසා තිබූ බව කියයි.

කෙසේ නමුත් ජනතාව පවසන්නේ අද (21) අලුයම් කාලයේ කිසිවකු විසින් මෙම දේව ප්‍රථිමාවේ වීදුරු කුඩුකර ඉන් පසුව එයට ඇතුල් වී මෙම රන් මාලය සොරා ගෙන ගොස් ඇති බවයි.

 ජනතාව පවසන්නේ මෙම රන් මාලය පවුම් දෙකකට ආසන්න බරකින් යුක්ක වූවක් බවත් දේවාලයට භාරයක් ඔප්පු කිරීමට තබ්බෝව ප්‍රදේශයේම පදිංචි අයකු පූජා කර තිබූ බවත්ය.

කෙසේනමුත් මේ පිළිබඳව කිසිවකුත් අද (21) දහවල් වනතුරුත් කරුවලගස්වැව පොලිසියට පැමිණිලි කර නැති බව පොලිසියෙන් කළ  විමසීමේදී පැවසීය.