(ප්‍රසන්න පත්මසිරි)

බදුල්ල මහ නගර සභාවේ අයවැය පිට පිටම තෙවරක් පරාජයට පත්වීම නිසා දින 11කට පෙර ඌව පළාත් ආණ්ඩුකාරවරයාගේ නියෝගයන් ධුරයෙන් ඉවත් කළ නගරාධිපති ප්‍රියන්ත අමරසිරි මහතා එක්සත් ජාතික පක්ෂයේ හා ශ්‍රී ලංකා පොදුජන පෙරමුණේ මන්ත්‍රි පිරිසකගෙ ජන්දයෙන් යළි නගරාධිපති තේරී පත්විය.

ශ්‍රී ලංකා පොදුජන පෙරමුණේ හා ශ්‍රී ලංකා නිදහස් පක්ෂයේ මන්ත්‍රිවරුන්ගේ ජන්දයෙන් ප්‍රියන්ත අමරසිරි මහතා තේරී පත්ව නගරාධිපති තනතුරේ කටයුතු කරන අතරතුර  පිට පිටම තෙවරක්ම අයවැය පරාජයවීම නිසා අකර්යක්ෂම සේවයක් නගර සභාව තුළ පැවතීම හේතුවෙන් ප්‍රියන්ත මහතා නගරාධිපති තනතුරින් ඉවත් කළේය.

යළි නගරාධිපතිවරයකු පත් කර ගැනීම සඳහා ඌව පළාත් පාලන කොමසාරිස් මංගල විජේනායක මහතාගේ ප්‍රධානත්වයෙන් මහ නගර සභා පුරහලේ රැස්වීම් ශාලාවේදි පැවති මහා සභාරැස්වීමේදි සභිකයින් අතර විවෘත්ත ජන්දයක් පවත්වා නගරාධිපතිවරයා තෝරා පත්ගැනීම සිදු විය.

එහිදී  ශ්‍රී ලංකා නිදහස් පක්ෂ මන්ත්‍රි යසන්ත චන්දිම දසානායක මහතා  හිටපු උප නගරාධිපති අසිත නලින්ද රංගේ බංඩාර මහතාගේ නම යෝජනා කළ අතර එම යෝජනාව එම පක්ෂයේම මන්ත්‍රි ප්‍රසන්න ප්‍රිය එදිරිසිංහ මහතා විසින් ස්ථීර කළේය.

එක්සත් ජාතික පක්ෂ මන්ත්‍රි සෙල්වප්පා සුරේෂ් මහතා හිටපු නගරාධිපති ප්‍රියන්ත අමරසිරි මහතාගේ නම යෝජනා කළ අතර එම පක්ෂයේම මන්ත්‍රි අචල මහානාම මහතා එය ස්ථීර කළේය.

ඉන් අනතුරුව පැවති විවෘත්ත ජන්දයේදි ශ්‍රී ලංකා පොදුජන පෙරමුණේ මන්ත්‍රිවරුන් දෙදෙනකු හැර සියලුම දෙනාත් එක්සත් ජාතික පක්ෂයේ  මන්ත්‍රිවරුන් සියලු දෙනා හිටපු නගරාධිපති ප්‍රියන්ත අමරසිරි මහතාට ජන්ද  ලබාදුන් අතර ඔහුට පක්ෂව ඡන්ද 15ක් හිමි විය.

හිටපු උප නගරාධිපති අසිත නලින්ද රංගේ බංඩාර මහතා ශ්‍රී ලංකා නිදහස් පක්ෂයේ මන්ත්‍රිවරුන් පස්දෙනා සමග ශ්‍රී ලංකා පොදුජන පෙරමුණේ මන්ත්‍රිනී සුජාතා දමයන්ති මහත්මිය ද සමග ජන්ද හයක් අසිත නලින්ද රංගේ බංඩාර මහතා හිමිව තිබිණ.