(නිමන්ති රණසිංහ)
 
 
පර්පෙචුවෙල් ටෙ‍්‍රෂරීස්  සමාගම් සමූහයේ සභාපති ජෙෆ්රි ජෝෂප් අලෝසියස් යන අයට පනවා තිබූ විදෙස් ගමන් තහනම දින හතක කාලයක් සදහා තාවකාලිකව ඉවත් කිරීමට කොළඹ ප‍්‍රධාන මහේස්ත‍්‍රාත් ලංකා ජයරත්න මෙනෙවිය අද  (05) නියම කළාය.
 
විදෙස් ගමන් තහනම තාවකාලිකව ඉවත් කිරීම සදහා අපරාධ පරීක්ෂණ දෙපාර්තමේන්තුවේ විරෝධතාවක් නොවූ බැවින් රුපියල් ලක්ෂ 10ක ශරීර ඇපයක් මත ප‍්‍රතිකාර සදහා ඉන්දියාව බලා පිටත්ව යාමට ජෙෆ්රි ජෝෂප් ඇලෝසියස් යන අයට එලෙස අධිකරණයෙන් අවසර ලැබිණී.
 
එසේම, ජෙෆ්රි ජෝෂප් ඇලෝසියස් යන අයට සිංගප්පූරුව බලා පිටත් වීම සදහා අවසර ලබා දෙන ලෙසට අධිකරණයෙන් කළ ඉල්ලිම සදහා අපරාධ පරික්ෂණ දෙපාර්තමේන්තුව විරුද්ධත්වය ප‍්‍රකාශ කළ බැවින් එම ඉල්ලීම අධිකරණය ප‍්‍රතික්ෂේප කළේය.
 
ශී‍්‍ර ලංකා මහ බැංකුව විසින් බැදුම්කර නිකුතුවේදී අක‍්‍රමිකතාවක් සිදුකර රජයට පාඩු සිදුකළැයි කියන සිද්ධියේ දෙවැනි සැකකරු වූ පර්පෙචුවෙල් ටෙ‍්‍රෂරීස් සමාගම් සමූහයේ අධ්‍යක්ෂ අර්ජුන් ඇලෝසියස් මහතාගේ පියා වූ ජෙෆ්රි ජෝෂප් ඇලෝසියස් මහතා මෙම සිද්ධිය සම්බන්ධයෙන් විදෙස් ගමන් තහනම් කර සිටින පාර්ශ්වකරුවෙකි.