රත්ගම,  රත්නඋදාගම  ප්‍රදේශයේ ව්‍යාපාරිකයන් දෙදෙනකු පැහැරගෙන ගොස් පුළුස්සා ඝාතනය කළ බව කියන සිද්ධිය සම්බන්ධයෙන් සිදුකෙරෙන විමර්ශනයකට අදාළව දකුණු පළාත බාර  හිටපු ජ්‍යෙෂ්ඨ නියෝජ්‍ය පොලිස්පති රවී විජේගුණවර්ධන මහතාගෙන් අපරාධ පරීක්ෂණ දෙපාර්තමේන්තුව ඊයේ (19) පැය 7කට ආසන්න කාලයක් ප්‍රශ්න කර ප්‍රකාශ සටහන් කරගත් බව පොලිස් මූලස්ථානය කියයි.

 මෙම ඝාතන සිද්ධිය සම්බන්ධයෙන් ප්‍රකාශ ලබාගැනීමට ජ්‍යෙෂ්ඨ නියෝජ්‍ය පොලිස්පති රවී විජේගුණවර්ධන මහතා අපරාධ පරීක්ෂණ දෙපාර්තමේන්තුව වෙත කැඳවූ ප්‍රථම අවස්ථාව මෙයවිය.

අපරාධ පරීක්ෂණ දෙපාර්තමේන්තුව කළ දැනුම්දීමකට අනුව ජ්‍යෙෂ්ඨ නියෝජ්‍ය පොලිස්පතිවරයා ඊයේ පෙරවරු 9.30 ට එහි පෙනීසිටි අතර මෙම ප්‍රශ්නකිරීම පස්වරු 5.00 දක්වා පැවැත්විණි.

මෙම සිද්ධිය සම්බන්ධයෙන්  ජ්‍යෙෂ්ඨ නියෝජ්‍ය පොලිස්පතිවරයාගෙන් තවදුරටත් ප්‍රකාශ ලබාගැනීමට නියමිත බවත් ඉදිරි දිනවලදී ද ඒ මහතා  කැඳවන බවද පොලිස් ආරංචි මාර්ග කියයි.

රත්ගම,  රත්නඋදාගම පදිංචි මාළු හා කුකු`ථ මස් ව්‍යාපාරිකයන් වූ රසිත් චින්තක (31) හා මංජුල අසේල (30) යන දෙදෙනා ඉකුත්  ජනවාරි මස 23 වැනි දින  පැහැරගෙන ගොස්  ඝාතනය කර පුළුස්සා  වළදැමූ බව කියන සිද්ධිය සම්බන්ධයෙන් දකුණු පළාත් බාර ජ්‍යෙෂ්ඨ නියෝජ්‍ය පොලිස්පතිවරයාගේ ඍජු අධීක්ෂණ යටතේ තිබූ දකුණු පළාත් විශේෂ  විමර්ශන ඒකකයට චෝදනා එල්ල වී තිබුණි.

ව්‍යාපාරිකයන් දෙදෙනාගේ මළ සිරුරු වලස්මුල්ල ප්‍රදේශයේ රක්ෂිතයක වළදමා තිබියදී අපරාධ පරීක්ෂණ දෙපාර්තමේන්තුව විසින් මීට පෙර සොයාගෙන තිබුණි.

  එම සිද්ධිය සම්බන්ධයෙන් එම විශේෂ විමර්ශන ඒකකයේ ස්ථානාධිපති, වැඩබලන ස්ථානාධිපති ඇතුළු හත් දෙනෙක් අත්අඩංගුවට ගෙන තවමත් රිමාන්ඞ් බාරයේ පසුවෙති.

සිද්ධියෙන් පසු දකුණු පළාත් විශේෂ විමර්ශන ඒකකය පොලිස්පතිවරයා විසින් විසුරුවා හැර තිබූ අතර දකුණු පළාත් බාර ජ්‍යෙෂ්ඨ නියෝජ්‍ය පොලිස්පතිවරයා වශයෙන් සිටි රවී විජේගුණවර්ධන මහතා  පොලිස් මූලස්ථානය වෙත මාරුකර යවා තිබූ අතර දැනට ඔහු උතුරු පළාත් බාර ජ්‍යෙෂ්ඨ නියෝජ්‍ය පොලිස්පතිවරයා වශයෙන් කටයුතු කරමින් සිටියි.

  මෙම සිද්ධිය සම්බන්ධයෙන් ප්‍රකාශ ලබාගැනීමට අද (20) ගාල්ල කොට්ඨාස බාර පොලිස් අධිකාරි අනුරුද්ධ බණ්ඩාර මහතා, අපරාධ  පරීක්ෂණ දෙපාර්තමේන්තුවට කැඳවා ඇති බව පොලිස් ආරංචි මාර්ග  පවසයි.