(නිමල කොඩිතුවක්කු)
 
ජනාධිපතිවරයා රටින් පිටව ගොස් සිටියත් අග‍්‍රාමාත්‍ය රනිල් වික‍්‍රමසිංහ මහතාට රටේ ආරක්ෂාව සම්බන්ධයෙන් ඕනෑම තීරණයක් ගෙන ක‍්‍රියාත්මක  කිරීමට සියලු බලතල හිමිව ඇතැයි  රාජ්‍ය ව්‍යවසාය, කන්ද උඩරට උරුමය සහ මහනුවර සංවර්ධන අමාත්‍ය සහ පාර්ලිමේන්තුවේ සභා නායක ලක්ෂ්මන් කිරිඇල්ල මහතා කොළඹදී අද(13) පැවැසීය.
 
පාස්කු ඉරිදා ඇතිවූ  සිද්ධියෙන් පසුවද පැය 9ක් යාමට මත්තෙන් අවශ්‍ය පළමු ත‍්‍රස්ත කණ්ඩායම අත්අඩංගුවට ගැනීමට  උපදෙස් ලබාදෙනු ලැබුවේද අග‍්‍රාමාත්‍ය රනිල් වික‍්‍රමසිංහ මහතා විසින් බවද  අමාත්‍යවරයා සඳහන් කළේය.
 
කොළඹ ලෝක වෙළඳ මධ්‍යස්ථානයේ පිහිටි රාජ්‍ය ව්‍යවසාය, කන්ද උඩරට උරුමය සහ මහනුවර සංවර්ධන අමාත්‍යාංශයේ පැවති මාධ්‍ය හමුවකට එක්වෙමින් ඔහු මේ බව පැවැසීය.
 
එහිදී වැඩිදුරටත් අදහස් දැක්වූ අමාත්‍ය ලක්ෂ්මන් කිරිඇල්ල මහතා මෙසේද කීය.
 
“රටේ ව්‍යවස්ථාව  අනුව අගමැති තමයි ජනාධිපතිවරයාට පස්සේ ඉන්න ප‍්‍රධානියා. අගමැතිතුමාට නෛතික බලතල නැති වුණත් එතුමා මැදිහත්වෙලා රටේ  ආරක්ෂාව වෙනුවෙන් අවශ්‍ය ක‍්‍රියාමාර්ග ගනීවී.
 
අගමැතිතුමාටත් යම් යම් අවහිරතා සිදුකරලා තියෙනවා. ආරක්ෂක කවුන්සිලය කැඳවන්න කිවුවම  ඒ අය ආරක්ෂක කවුන්සිලය කැදෙව්වේ නැහැ. ඒ අවස්ථාවේදීත් අගමැතිතුමා රට ගැන හිතලා ආරක්ෂක අමාත්‍යාංශයට  ගිහින් අවශ්‍ය තීන්දු තීරණ ගත්තා.  ඒ අනුව පැය කිහිපයක් යන්නට මත්තෙන් මේ ත‍්‍රස්ත ප‍්‍රහාරයේ ප‍්‍රධානින් විශාල පිරිසක් අත්අඩංගුවට ගැනීමට හැකිවුණා” යැයිද අමාත්‍යවරයා එහිදි පැවැසීය.

(ඡායාරූප - ළහිරු හර්ෂණ)