(නාලක සංජීව දහනායක)

සිය පෞද්ගලික කාර්ය මණ්ඩලය හා නිල රථ සීමා කිරීම කෙරෙහි ජනාධිපති ගෝඨාභය රාජපක්‍ෂ මහතාගේ අවධානය යොමුවී ඇතැයි ජනාධිපති ලේකම් කාර්යාල ආරංචි මාර්ග සඳහන් කරයි.

ඒ අනුව ජනාධිපති පෞද්ගලික කාර්ය මණ්ඩලය බොහෝ දුරට පනහට අඩු පිරිසකගෙන් සමන්විත වනු ඇතැයි වාර්තා වේ.

ඊට අමතරව අමාත්‍ය කාර්ය මණ්ඩල හා අමාත්‍ය නිල රථද සීමා කෙරෙනු ඇතැයි එම ආරංචි මාර්ගවලින් පැවැසේ.

විශාල කාර්ය මණ්ඩලයක් නඩත්තු කිරීමෙන් වියදම හා නාස්තිය අධික වන බැවින් මුදල් ඉතිරිකර ගැනීමේ පියවරක් වශයෙන් ජනාධිපතිවරයා මෙම තීරණය ගැනීමට නියමිතය.

රාජ්‍ය ආයතනවල ජනාධිපතිවරයාගේ ඡායාරූපය වෙනුවට රාජ්‍ය ලාංඡනය ප්‍රදර්ශනය කරන ලෙසත්, මහාමාර්ගවල අමාත්‍යවරුන්ගේ ඡායාරූප ප්‍රදර්ශනය නොකරන ලෙසත් ජනාධිපතිවරයා පෙරේදා උපදෙස් දුන් අතර ඒ අනුව මේ වනවිටත් බොහෝ රාජ්‍ය ආයතනවල  රාජ්‍ය ලාංඡනය ප්‍රදර්ශනය කර ඇත.