(මුදිතා දයානන්ද)
 
ජනපතිවරණයට තමන් ඉදිරිපත් කළ අපේක්ෂකයා ජයගෙන නොතිබුණද, රටත් ජනතාවත් වෙනුවෙන් නොසැලී ඉදිරියටත් සිය වගකීම හා යුතුකම මදකුදු අඩුනොකර ඉටුකරන බවද ජාතික ජනබලවේගය අද(17) නිවේදනයක් නිකුත් කරමින් සඳහන් කර තිබේ.
 
ජාතික ජන බලවේගය ලෙස මෙවර ජනපතිවරණයේදි මීට වඩා වැඩි ප්‍රතිඵලයක් ලැබෙනු ඇතැයි බලාපොරොත්තු වූ අතර ලැබුණ ප්‍රතිඵලය ගැන සතුටු විය නොහැකි බවද  එම නිවේදනයේ සඳහන් වේ.
 
ප්‍රතිඵලවලින් සංඛ්‍යාත්මකව තමන් පසුපසින් සිටියද  ජාතික ජන බලවේගය නම් වූ පුළුල් ප්‍රජාතන්ත්‍රවාදී, ප්‍රගතිශීලී, වාමවාදී හා සැබෑ දේශප්‍රේමී දේශපාලන කඳවුරක්, පුළුල් මහජන ව්‍යාපාරයක ආරම්භ  කිරීමට සමත් වීමද,  මඩ ගැසීම, අසභ්‍ය වචන කීම, සිල්ලර පොරොන්දු තොග ගණනින් දීම වෙනුවට, රට තුළ ගැඹුරු ප්‍රතිපත්තිමය සංවාදයක් වේදිකා තුළ ගොඩනගා ගැනීමට සමත් වීම, දිගුකාලීන දේශපාලන ජයග්‍රහණයක් සේ සලකන බවද එහි සඳහන්වේ.
 
ජනාධිපතිවරණ වේදිකාවල සමහර පක්ෂ ජාතිවාදය අවුලුවා විවිධ ජාතිකත්වයන් එකිනෙකා කෙරෙහි බියවද්දා ඡන්දය ලබාගනිද්දී ප්‍රතිපත්තිමය සංවාදයක් තුළින් ජනතාව දැනුවත්භාවයට පත්කර, ඡන්දය ලබාගැනීමට අප දැරූ උත්සාහයට ඉඩක් නොවූ බව මැතිවරණ ප්‍රතිඵලයෙන් පැහැදිලි වන බවද එවැනි තත්ත්වයක් තුළ වුවද ජාතිවාදයෙන් තොර, ජාතික සමගිය සහිත මැතිවරණ වේදිකාවක් තැනීමට තමන්ට හැකිවීම අනාගතය හා සලකන විට සාධනීය කරුණක් සේ දකින බවද එම නිවේදනයේ දක්වා තිබේ.
               
මෙම මැතිවරණ ප්‍රතිඵලයෙන් ජයග්‍රහණය කළ , තම ජයග්‍රහණයන් පිළිබඳව උදම් අනමින් සතුටු වුවද තමන් ජයග්‍රහනය කර නැති බව ජනතාව නොබෝ කලකින්ම් තේරුම් ගනු ඇති බවද ජනතාවට උරුමවනු ඇත්තේ පැරණි 71ක් වසරක් පුරා ආ එකතැන පල්වෙන පීඩාකාරී සමාජ ජීවිතයම බවද  එම ජනතාවත්, රටත් වෙනුවෙන් තම වගකීම හා කාර්යභාරය මඳකුදු අත්නොහැර ඉටුකරන බවද එම නිවේදනයේ දැක්වේ.
               
තම අපේක්ෂකයා වූ අනුර කුමාර දිසානායක මහතා වෙනුවෙන් ඡන්දය භාවිතා කළ හා කිසිදු ලාභ අපේක්ෂාවකින් තොරව නන් අයුරින් සහය දැක්වු සියලු ජනතාවට ස්තූතිය පළ කරන බවද ජාතික ජනබලවේගය සිය නිවේදනයේ වැඩිදුරටත් සඳහන් කර තිබේ.