(අජන්ත කුමාර අගලකඩ)

රජය ආරම්භ කර ඇති කාබනික පොහොර වැඩපිළිවෙළ සම්බන්ධයෙන් සාකච්ඡාවකට එන්නැයි ජනාධිපති ගෝඨාභය රාජපක්ෂ මහතා විපක්ෂ නායක සජිත් ප්‍රේමදාස මහතාට ආරාධනය කර ඇත .

ජනාධිපතිවරයා විපක්ෂ නායකවරයාට ඊයේ (06)දුරකථන ඇමතුමක් දෙමින් මෙම ආරාධනය කර ඇතැයි රජයේ ආරංචි මාර්ග සඳහන් කරයි .

රජයේ ඉහළ නිලධාරීන් පිරිසක් සමග ජනාධිපති කාර්යාලයේ ඊයේ පැවැති සාකච්ඡාවක් අතරතුර විපක්ෂ නායකවරයාට දුරකථන ඇමතුමක් ගෙන ඇති ජනාධිපතිවරයා කාබනික පොහොර සම්බන්ධයෙන් රජය ගෙන යන වැඩපිළිවෙළට විරුද්ධදැයි විමසා ඇති බව ද වාර්තා වේ .

ඊට පිළිතුරු දී ඇති විපක්ෂ නායකවරයා කෘෂිකර්ම අමාත්‍යාංශයේ සහ එහි නිලධාරීන්ගේ පැත්තෙන් විශාල චෝදනා පත්‍රයක් ඇවිත් තිබෙන බව සදහන් කර ඇතැයි දැනගන්නට තිබේ .

අනතුරුව කෘෂිකර්ම අමාත්‍යාංශයේ ඉහළ නිලධාරීන්ට කතා කර ඇති ජනාධිපතිවරයා කාබනික පොහොර වැඩපිළිවෙළ සම්බන්ධයෙන් වාර්තාවක් ප්‍රසිද්ධ වී ඇද්දැයි විමසා ඇති අතර එවැනි ලියවිල්ලක් නැති බව එම නිලධාරීන් ප්‍රකාශ කර ඇතැයි ද වාර්තා වේ .

කෙසේ නමුත් ,මේ සම්බන්ධයෙන් දීර්ඝ වශයෙන් සාකච්ඡා කිරීම සඳහා පැමිණෙන්නැයි ජනාධිපතිවරයා විපක්ෂ නායකවරයාට ආරාධනය කර ඇත .