(එෆ්.අස්ලම්)


යුද අපරාධ හා මානව හිමිකම් කඩවීම් සම්බන්ධයෙන් ජාත්‍යන්තර අපරාධ අධිකරණයක් මෙරට ස්ථාපිත කළ යුතු බවට හා එක්සත් ජාතීන්ගේ සංවිධානය විසින් ඒ වෙනුවෙන් නිත්‍ය නියෝජිතයෙකු පත් කළ යුතු බවට ඉලංගයි තමිල් අරසුකච්චි පක්ෂය ප්‍රමුඛ උතුරේ දෙමළ දේශපාලන පක්ෂ හයක් පවසයි.


ජිනීවා මානව හිමිකම් කවුන්සිලයේ යෝජනාව ක්‍රියාත්මක කිරීමට රජය අපොහොසත් වීම මත එම යෝජනාව ක්‍රියාත්මක කිරීම සදහා ශ්‍රී ලංකාවට තවදුරටත් කාලය ලබා නොදෙන ලෙසට මෙම පක්ෂ පොදුවේ ජගත් මානව හිමිකම් කවුන්සිලයට බලකර සිටින බවද දෙමළ ජාතික සන්ධාන හිටපු උතුරු පළාත් සභා මන්ත්‍රී ටෙලෝ සංවිධානයේ උප සභාපති එම්. කේ. සිවාජිලිංගම් මහතා පැවසීය.


එක්සත් ජාතීන්ගේ මානව හිමිකම් කවුන්සිලයේ 40වන සැසිවාරය ඇරඹීමත් සමග එහිදී කටයුතු කළයුතු ආකාරය පිළිබඳව සාකච්ඡා කිරීම සඳහා ඉලංගයි තමිල් අරසු කච්චි, ප්ලොට් ,ටෙලෝ, ඊ.පී.ආර්.එල්.එෆ්, දෙමළ විමුක්ති පෙරමුණ, තමිල් මක්කල් කූට්ටනි යන පක්ෂවල නියෝජිතයින් යාපනයේ පෞද්ගලික හෝටලයකදී රැස්වී මෙම තීරණ ගෙන තිබේ.


මේ සම්බන්ධයෙන් මෙකී පොදු ස්ථාවරයේම කටයුතු කිරීමටත් සෙසු දෙමළ දේශපාලන පක්ෂවල සහාය ලබාගැනීමටත් මෙම දේශපාලන පක්ෂ හයෙහි ජ්‍යෙෂ්ඨයින් තීරණය කර ඇත.


දෙමළ දේශපාලන පක්ෂ රැස්ව ගනු ලැබූ මෙම තීරණ සහ ඉල්ලීම් ඇතුළත් වාර්තාව එක්සත් ජාතීන්ගේ මානව හිමිකම් කොමසාරිස්වරයාටත් ජගත් සංවිධානයේ මහ ලේකම්වරයාටත් බාර දෙන බවත් එම්. කේ. සිවාජිලිංගම් මහතා පැවසීය.