චීන ජනපති ෂී ජින්පින් මහතා, කොරෝනා වයිරසය ආරම්භ වූ බවට සැලකෙන වූහාන් නුවරට අද (10) පැමිණියේය. වූහාන් නගරයේ කොරෝනා ව්‍යාප්තවීම ආරම්භ වීමෙන් පසු ජනපති එහි පැමිණි පළමු අවස්ථාව මෙය විය.

වයිරසය පාලනය කිරීම වෙනුවෙන් කෙරෙන කටයුතු සොයාබැලීම සහ මේවනවිට බීජිං නුවර, වයිරසය පාලනය කර ඇති බව දැන්වීම සඳහා ෂී ජින්පින් මහතා එහි පැමිණි බව වාර්තා වේ.
 
චීනය හුබෙයි පළාතේ ආසාදිතයන් සංඛ්‍යාව අඩුම අගයක් (19) වාර්තා කළ අද දිනයේදී ජනපති එහි පැමිණි බව චීන මාධ්‍ය සඳහන් කර තිබිණි.
 
චීනයේ 80,754 දෙනෙකුට වයිරසය ආසාදනය වී ඇති අතර, පුද්ගලයන් 3,136 ක් මිය ගොසිනි.
 
ජනපතිවරයා වූහාන්හි පිහිටි නිරෝධායන මධ්‍යස්ථානයකටද පැමිණියේය. දින 10ක් ඇතුළත නිම කළ රෝහලට ද පැමිණි චීන ජනපතිවරයා එහි පහසුකම්, රෝගීන්ට කරන ප්‍රතිකාර, වෛද්‍ය සේවකයන්ගේ සෞඛයාරක්ෂිත කටයුතු මෙන් ම විද්‍යාඥයන්ගේ පර්යේෂණ සම්බන්ධවද සොයාබැලීය.
 
ග්ලෝබල් ටයිම්ස් පුවත්පත පවසා තිබුණේ, ජනපතිවරයාගේ පැමිණීම සමස්ත රටට මෙන්ම ලෝකයට ම බලවත් සංඥාවක් ලබාදුන් බවය, වයිරසයේ ලෝක ව්‍යාප්තිය සම්බන්ධයෙන් අඳුරුතම මොහොතෙන් චීනය දැන් නැගී සිටිමින් පවතින බවය.
 
චීන ජනපති ෂී ජිනපින් මහතා රෝහලේ කාර්ය මණ්ඩලයට සහ රෝගියකු සමඟ සුහද කතබහක නිරත වන වීඩියෝවක්ද මාධ්‍යය නිකුත් කර තිබිණි.
 
ජනපතිවරයා කොයිතරම් කාලයක් වූහාන් නගරයේ රැඳී සිටීද යන්න මෙතෙක් අනාවරණය වී නොමැත.

(බීබීසී ඇසුරිනි)

16844