(රොමේෂ් මධුෂංඛ)

මුලතිව් ගුරුකන්ද පුරාණ රජමහා විහාරය හා දේපාර්ශවයක් අතර ඇතිවූ සාමය කඩවීමක් සම්බන්ධයෙන් මුලතිව් අධිකරණයේ දී ගොනුකර ඇති නඩුවේ තීන්දුව අද (28) ලබාදීමට තිබුණ ද එක් පාර්ශවයක් පෙනී නොසිටීම හේතුවෙන් ලබන අප්‍රේල් 22 වැනි දා දක්වා කල්දැමීමට මුලතිව් මහෙස්ත්‍රාත් එස්.ලෙනින් කුමාර් මහතා නියෝග කළේය.

අදාළ නඩුවේ එක් පාර්ශවයක් වූ මුලතිව් ගුරුකන්ද රජමහා විහාරයේ විහාරාධිපති කොළඹ මේධාලංකාර කිත්ති හිමියන්ට අසනීප තත්වයක් හේතුවෙන් රෝහලගත වී ප්‍රතිකාර ලබන හෙයින් නඩු වාරයට පෙනී සිටීමට නොහැකි බවට මුලතිව් මහෙස්ත්‍රාත්වරයාට දැනුම් දීමෙන් පසුව මහෙස්ත්‍රාත්වරයා විසින් නඩු තීන්දුව දීම අප්‍රේල් 22 වැනිදාට කල් දැමීමට නියෝග කළේය.

පෙබරවාරී 12 වැනි දා මුලතිව් ගුරුකන්ද රජමහා විහාර භූමිය සම්බන්ධයෙන් පුරාවිද්‍යා අධ්‍යක්ෂ ජනරාල් වරයාගෙන් වාර්තාවක් කැඳවා තිබූ අතර ඒ අනුව පුරාවිද්‍යා අධ්‍යක්ෂක ජනරාල් මහාචාර්ය පී.බී.මණ්ඩාවල මහතා විසින් මුලතිව් අධිකරණයේ දී පෙනී සිටිමින් අදාළ වාර්තාව ඉදිරිපත් කරමින් පැවසුවේ මුලුතිව් නයාරු ගුරුකන්ද පුරාණ රජමහා විහාරය පුරාවිද්‍යා පනත මගින් නියාමනය වන පුරාවිද්‍යා ස්ථානයක් බවත් ගුරුකන්ද රජමහා විහාරය පවතින ස්ථානයේ මුලතිව් කෝකිලායි මාර්ගය දෙපසම මැනුම්ගත කරන ලද පුරාවිද්‍යා ස්මාරකයක් සහිත ප්‍රදේශයක් වන බවයි.

කෙසේ වෙතත් මේ වන විට මුලතිව් අධිකරණයේ ගුරුකන්ද රජමහා විහාරය සම්බන්ධයෙන් මුලතිව් පොලීසිය මගින් නඩු දෙකක් ගොනු කර ඇති අතර ඉන් අපරාධ නඩු විධාන සංග්‍රහ පනතේ 81 වගන්තිය යටතේ පාර්ශවයන් දෙකක් අතර සාමය කඩවීම වලක්වාලීමට බැඳුම්කරයකට අත්සන් කළ යුතු ද නැද්ද සම්බන්ධයෙන් වූ නඩුව හා පුරාවිද්‍යා භූමියකට ඇතුළු වී ස්වාමීන් වහන්සේට බැන තර්ජනය කර පුරාවිද්‍යා භූමියේ කැනීමක් කළ බවට වූ බී වාර්තාව දෙවන නඩුවයි.

පසුගිය ජනවාරී 14 වැනි දා ගුරුකන්ද පුරාණ රජමහා විහාර භූමියට අනවසරයෙන් පිරිසක් ඇතුළු වී මුල් ගලක් තැබීමකට සැරසීම නිසා ඇති වූ නොසන්සුන්තාවයක් හේතුවෙන් මුලතිව් පොලීසිය විසින් අදාළ නඩු ගොනු කර තිබිණි.