(ඩයනා උදයංගනී සහ සුජිත් හේවාජුලිගේ)

කොවිඩ් ආසාදිතයින්ට වැළඳෙන කළු දිලීර රෝගය වැළඳුණු රෝගීන් කිහිපදෙනෙක් කොළඹ ජාතික රෝහලෙන් මෙන්ම කුරුණෑගල සහ රත්නපුර රෝහල්වලින් හඳුනාගෙන ඇතැයි නියෝජ්‍ය සෞඛ්‍ය සේවා අධ්‍යක්‍ෂ ජනරාල් විශේෂඥ වෛද්‍ය හේමන්ත හේරත් මහතා අද (15) පැවසීය.

මේ වන විට වැළඳුණු රෝගීන් සංඛ්‍යාව තමා සතුව නොමැති නමුත් එය ඉතා කුඩා සංඛ්‍යාවක් බවද ඔහු ප්‍රකාශ කළේය.

මෙය එකිනෙකා අතර වසංගතයක් ලෙස බෝ නොවන නමුත් ප්‍රතිශක්තිය හීන අයට මෙය වැළඳීමේ අවදානමක් තිබෙන බව වෛද්‍යවරයා සඳහන් කළේය.
මෙය වැළඳෙන්නේ ප්‍රතිශක්තිය ඉතාම අඩු අයට බැවින් එම මාරාන්තිකවීමේ වැඩි අවස්ථාවක් ඇතැයි ද හේමන්ත හේරත් මහතා කීවේය.

මීට පෙර කළු දිලීර රෝගීන් මෙරටින් හමුවී ඇතත් කොවිඩ් රෝගීන්ට වැළඳී නොතිබූ බව ද හෙතෙම පැවසීය.

විශේෂඥ වෛද්‍ය හේමන්ත හේරත් මහතා මේ බව පැවසුවේ සෞඛ්‍ය ප්‍රවර්ධන කාර්යාංශයේදී අද (15) පැවති මාධ්‍ය හමුවකදී මාධ්‍යවේදියකු නැගූ පැනයකට පිළිතුරු දෙමිනි.
මෙහි රෝග ලක්ෂණ තීරණය වෙන්නේ රෝගය ඇතිවන ස්ථානය අනුව බව ද කී වෛද්‍යවරයා සමේ, නාසය, මොළය ආශ්‍රිතව, පෙනහළුවල, ඇස හෝ ඇස ආශ්‍රිතව, ශරීරයේ අභ්‍යන්තර ඕනෑම මතුපිටක මෙය ඇතිවිය හැකි බව ද වෛද්‍යවරයා පැවසීය.

පරිසරයේ ඇති දිලීරයක් හේතුවෙන් ඇතිවන මෙම තත්වය ඇතිවන්නේ ශරීරයේ ප්‍රතිශක්තිය ඉතාම අඩු පුද්ගලයින්ට පමණක් බව කී වෛද්‍යවරයා පාලනය නොකළ බෝ නොවන රෝගවලින් පෙළෙන අය, ඉන්ද්‍රියන් බද්ධ කළ හා ප්‍රතිශක්තිකරණයට බෙහෙත් ලබාගන්නා අයට මෙය වැළඳීමේ වැඩි ඉඩකඩක් ඇතැයි සඳහන් කළේය.
මෙය පුද්ගලයාගෙන් පුද්ගලයාට බෝ නොවන බව ද හෙතෙම පැවසීය.

පරිසරයේ ඇති දිරාපත්වන කසල පුස් ආදිය රැඳෙන ස්ථානවලින් තමයි වායුගෝලයට මෙම දිලීරයේ බීජාණු එක්වන බවත්, දිලීර ආසාදන රෝගයක ලක්‍ෂණ මතුවුවහොත් වෛද්‍ය උපදෙස් ලබාගැනීම වඩා සුදුසු බවත් හේමන්ත හේරත් මහතා කීවේය.