(කේ.බුද්ධික කුමාරසිරි සහ සෝමසිරි හිගුරලආරච්චි)

කොස්ගම සාලාව රෝහලේ කාර්ය මණ්ඩලයට බැන තර්ජනය කිරීමේ සිද්ධියක් සම්බන්ධයෙන් කොස්ගම පොලිසිය මගින් අත්අඩංගුවට ගත් සැකකරුවන් 11 දෙනෙකු අවිස්සාවේල්ල මහේස්ත්‍රාත් අධිකරණය වෙත ඉදිරිපත් කිරීමෙන් පසු ඇපමත මුදා හරින ලෙස අවිස්සාවේල්ල මහේස්ත්‍රාත් චමරි වීරසූරිය මහත්මිය අද (07) දින නියෝග කළාය.

සැකකරුවන් නීතිඥවරු මාර්ගයෙන් දිවුරුම් ප්‍රකාශ ඉදිරිපත් කර වරද පිළි ගැනීම හේතුවෙන් එක් අයෙකුට රුපියල් 50,000 බැගින් වූ ශරීර ඇප මත මුදා හැරීමට නියෝග කෙරිණි.

මහේස්ත්‍රාත්වරියගෙන් සැකකරුවන් 11 දෙනා කොස්ගම රෝහලේ කාර්ය මණ්ඩලයට බැන තර්ජනය කිරීමක් සිදු කර ඇති බැවින් සැකකරුවන් හඳුනා ගැනීමේ පෙරෙට්ටුවක් සඳහා ඉදිරිපත් කිරීමට නියෝගයක් ලබා දෙන ලෙස කොස්ගම පොලිසිය අධිකරණයෙන් ඉල්ලා සිටියේය.

ඒ අවස්තාවේදී සැකකරුවන් වෙනුවෙන් පෙනී සිටි නීතිඥ මඩුල්ල සැකකරුවන් වෙනුවෙන් අධිකරණය වෙත දිවුරුම් ප්‍රකාශ ඉදිරිපත් කරමින් සැකකරුවන් අතින් සිදු වූ වරද පිළි ගන්නා බවත් ඒ සම්බන්ධයෙන් රෝහල් කාර්ය මණ්ඩලයෙන් සමාව ඉල්ලා සිටින බවත් හඳුනා ගැනීමේ පෙරෙට්ටුවක් අවශ්‍ය නොවන බවත් මහේස්ත්‍රාත්වරියගෙන් ඉල්ලා සිටියේය.

ඒ අනුව සියලු කරුණු සලකා බලා සැකකරුවන් රුපියල් 50,000 ශරීර ඇප මත මුදා හැරීමට කටයුතු කරන මුත් පැමිණිලිකරුවන්ට යම් ආකාරයේ බලපෑම් සිදු කළ හොත් ඇප කොන්දේසි ඉවත් රක්ෂිත බන්ධනාගාර ගත කිරීමට කටයුතු කරන බව අප්‍රේල් මස 05 වැනි දින නැවත අධිකරනයේ පෙනී සිටින ලෙසත්  මහේස්ත්‍රාත් චමරි වීරසූරිය මහත්මිය නියෝග කළාය.