(කුෂාන් ජයවර්ධන)

කලාවැව හදිසි වාන් දොරටු දෙක අද (10) සවස අඩි 3 බැගින් විවෘත කළ බව කලාවැව කාර්යභාර ඉංජිනේරු කාර්යාලය පවසයි.

කලාවැවේ වාන්දොරටු විවෘත කිරීමත් සමග එමගින් මේ වනවිට කලා ඔයට මුදා හැරෙන ජල ප්‍රමාණය තත්පරයට ඝණ අඩි 3398 ක් වේ.

මේ වනවිට තත්ත්පරයට ඝණ අඩි 3884 ක පමණ ප්‍රමාණයක් දඹුලු ඔය ඇතුලු මුලාශ්‍රවලින් කලා වැවට ලැබෙමින් පවතින අතර තවදුරටත් වැසි තත්ත්වය පැවැතියහොත් අද (10) රාත්‍රියේ එම වාන්දොරටු තවදුරටත් විවෘත කිරීමට සිදුවන බව කලාවැව කාර්යභාර ඉංජිනේරු කාර්යාලය පවසයි.

එබැවින් අවධානයෙන් පසුවන ලෙසද එම කාර්යාලය කලා ඔය දෙපස පදිංචිකරුවන්ට දන්වා සිටී. කලාවැව වාන් දොරටු විවෘත කිරීමත් සමග කලාවැව අවුකන මාර්ගය අවුකන විහාරස්ථානය අසළදී ජලයෙන් යටවීම හේතුවෙන් එම මාර්ගයේ ගමනාගමනය ඇණහිට ඇති අතර ඒ වෙනුවට විකල්ප මාර්ග භාවිතා කරන ලෙස පොලිසිය රියදුරන්ට පවසයි.

ප්‍රදේශයට ඇදහැලෙන වර්ෂාවත් සමග මේ වනවිට කලා වැවේ ජලධාරිතාවය අක්කර අඩි 86000 ක් ඉක්මවා තිබේ.