(අජන්ත කුමාර අගලකඩ)

ශ්‍රී ලංකන් ගුවන් සමාගමට කල්බදු පහසුකම් යටතේ ගුවන් යානා ලබාදී ඇති සමාගම් එම කල්බදු මුදල අඩුකිරීමට එකඟතාව පළකර ඇත.
‍
කොරෝනා වසංගතය හමුවේ ගුවන් මගීන් ප්‍රවාහනය විශාල ලෙස පහත වැටීම හේතුවෙන් ශ්‍රී ලංකන් ගුවන් සමාගම ද දැඩි ආර්ථික අර්බුදයකට ලක්වී ඇති අතර, ඒ සම්බන්ධයෙන් අදාළ සමාගම් සමඟ කළ සාකච්ඡාවල ප්‍රතිඵලයක් ලෙස බදු මුදල් අඩු කිරීමට එකඟතාව පළවී තිබේ.

ශ්‍රී ලංකන් ගුවන් සමාගම සතුව ගුවන් යානා 24ක් ඇති අතර, ඒ සියල්ලම කල් බදු පහසුකම් යටතේ ලබාගත් ගුවන් යානා බව වාර්තා වේ.

මෙම ගුවන් යානා 24 සමාගම් 6කින් කල් බදු පහසුකම් යටතේ ලබාගෙන ඇති අතර, ඒ වෙනුවෙන් ගෙවනු ලබන බදු කුලිය ඇමෙරිකානු ඩොලර් කෝටි 108ක් පමණ වන බව පැවැසේ.

එම බදු කුලිය ඇමරිකානු ඩොලර් කෝටි 95ක් පමණ දක්වා, ඩොලර් කෝටි 13කින් පමණ අඩු කිරීමට අදාළ ගුවන් සමාගම් එකඟතාව පළ කර ඇතැයි වාර්තා වේ.

ඒ අනුව, ශ්‍රී ලංකන් ගුවන් සමාගම අදාළ ගුවන් සමාගම් සමඟ ඉදිරියේදී නව ගිවිසුම්වලට එළඹෙනු ඇතැයි සංචාරක ඇමැති ප්‍රසන්න රණතුංග මහතා කැබිනට් මණ්ඩලයට දැනුම් දී ඇත.