(ඩයනා උදයංගනී)

ගිනිකොණ දිග අරාබි මුහුදු ප්‍රදේශයේ පැවති අඩුපීඩන කලාපය පීඩන අවපාතයක් දක්වා වර්ධනය වී ඇති බැවින් කන්කසන්තුරය, සිට මන්නාරම හරහා කොළඹ දක්වා වන මුහුදු ප්‍රදේශවල නැවත දැනුම් දෙන තුරු ධීවර සහ නාවුක කටයුතුවල යෙදීමෙන් වැළකී සිටිය යුතු බව කාලගුණ විද්‍යා දෙපාර්තමේන්තුව පවසයි.

දැනට එම මුහුදු ප්‍රදේශවල ඉතා තද සුළං ඇතිවන නිසා ධීවර හා නාවුක කටයුතුවල නිරත පිරිස් වහාම ගොඩබිමට හෝ ආරක්‍ෂිත ස්ථානයක් කරා ගමන් කළ යුතු බව එම දෙපාර්තමේන්තුව සඳහන් කරයි.

එමෙන්ම කොළඹ සිට ගාල්ල හරහා හම්බන්තොට දක්වා මුහුදු ප්‍රදේශවල ද තද සුළං ඇතිවිය හැකි බැවින් ධීවර හා නාවුක කටයුතුවල යෙදීමේදී අවදානයෙන් කටයුතු කළ යුතු බව කාලගුණ විද්‍යා දෙපාර්තමේන්තුවේ ප්‍රකාශකයෙක් පැවසීය.

දැනට පවතින පීඩන අවපාතය ගැඹුරු පීඩන අවපාතයක් දක්වා වර්ධනය වී උතුරට බරව වයඹ දිසාවට ගමන් කරමින් 18 වැනිදා උදෑසන කාලයේදී ගුජරාටි සහ පකිස්තානු වෙරළ තීරයට ඇතුළුවනු ඇතැයි පුරෝකථනය කර ඇත.

ඒ හේතුවෙන් හෙට (15) සිට ක්‍රමයෙන් මෙහි බලපෑම අඩුවී යනු ඇතැයි ද කාලගුණ විද්‍යා දෙපාර්තමේන්තුවේ එම ප්‍රකාශකයා කීවේය.

එසේ වුවත් හෙට (15) සහ අනිද්දා (16) දිනවල උතුරු, උතුරුමැද, වයඹ, මධ්‍යම, ඌව සහ නැගෙනහිර පළාත්වල පැයට කිලෝමීටර 50, 60 පමණ වේගවත් තද සුළං ඇතිවිය හැකි අතර සෙසු පළාත්වල පැයට කිලෝමීටර 40, 50 පමණ වේගවත් සුළං ඇතිවිය හැකි බව ද ඔහු පැවසීය.

බස්නාහිර, මධ්‍යම සබරගමුව සහ වයඹ පළාත්වලත්, ගාල්ල සහ මාතර දිස්ත්‍රික්කවලක් හෙට (15) දිනයේදීත් වැසි ඇතිවන අතර උතුරු සහ උතුරුමැද පළාත්වල ද මද වැසි ඇතිවිය හැකි බව එම ප්‍රකාශකයා සඳහන් කළේය.