(ඡායාරූප - ළහිරු හර්ෂණ)

(ඩයනා උදයංගනී)

ජනප්‍රිය විකට රංගන ශිල්පියකු, චිත්‍රපට අධ්‍යක්‍ෂකවරයකු, තිරකතා රචකයකු සහ වේදිකා නාට්‍ය අධ්‍යක්‍ෂකවරයකු වූ අභාවප්‍රාප්ත ටෙනිසන් කුරේ මහතාගේ දේහයට අවසන් ගෞරව දැක්වීම සඳහා දේශපාලනඥයින්, කලාකරුවන්, රසිකයින් ඇතුළු පිරිස් මොරටුව, විල්ලෝරාවත්ත පිහිටි ඒ මහතාගේ නිවසට පැමිණෙමින් සිටිති.

ටෙනිසන් කුරේ මහතා කොළඹ ජාතික රෝහලේ දී ඉකුත් 28 වැනිදා අභාවප්‍රාප්ත වූ අතර එදින සිටම ඔහුගේ නිවසට විවිධ අංශ නියෝජනය කරන පිරිස් පැමිණෙමින් සිටින්නේ තමන් සිනහගැන්වූ ඒ සොඳුරු කලාකරුවා අවසන් වරටත් දැකගැනීමේ අරමුණෙනි.

අග්‍රාමාත්‍ය මහින්ද රාජපක්‍ෂ, වෙළඳ අමාත්‍ය ආචාර්ය බන්දුල ගුණවර්ධන යන මහත්වරුන් ඇතුළු දේශපාලනඥයින්, කලාකරුවන් ඇතුළු පිරිසක් අද (30) දිනයේ ද ටෙනිසන් කුරේ මහතාට අවසන් ගෞරව දැක්වීමට පැමිණ සිටියහ.

මොරටුව විල්ලෝරාවත්තේදී උපත ලැබූ ටෙනිසන් කුරේ මහතා අභාවප්ප්‍රාප්ත වන විට 68 වියේ පසුවිය.

ඔහු එක්දරු පියෙකු වන ඔහු මොරටුව මෙතෝදිස්ත උසස් විදුහලේ අධ්‍යාපනය හදාර තිබේ.

‘පෙරළිකාරයෝ, නොම්මර එකයි, සොමි බොයිස්, වැඩ බැරි ටාසන්, චණ්ඩියගෙත් චණ්ඩියා, හොඳ හොඳ සෙල්ලං, හිතහොඳ පුතෙක්, දෙමෝදර පාළම, පාර්ලිමන්ට් ජෝක්ස්, තැන්ක් යූ බර්ටි, රෑ දනියෙල් දවල් මිගෙල්, ජොන්සන් ඇන්ඞ් ගොන්සන්, ඔබටයි ප්‍රියේ ආදරේ, රඹා සහ මධූ, රන්දෙණිගල සිංහයා, කොළොම්පූර්, ඇසළ සඳ, රංජා, ජීවිතේ ලස්සනයි, ආසයි බයයි, චෙරියෝ ඩාලිං, කිව්වද නහී නොකව්වද නහී, කම් ඕගෝ චිකාගෝ, අජේ සහ විජේ, චෙරියෝ කැප්ටන්, සුපිරි අන්දරේ, සිංග මචාං චාලි, චාන්දනී, ලව් 94, ලව් 2002, ඔහොම හරිද, ජුන්ඩයි ගුණ්ඩයි, අපායේ තත්ත්පර අසූහාරදහසක් ඇතුළු චිත්‍රපට රාශියකට හා පටලැවිල්ල ඇතුළු ටෙලිනාට්‍ය කිහිපයකට ඔහු රංගනයෙන් දායක විය.

තැන්ක් යූ බර්ටි චිත්‍රපටය ඔහු අධ්‍යක්‍ෂණය කළ එකම චිත්‍රපටය වන අතර එහි කථාව, දෙබස් හා තිර රචනය ඔහු විසින්ම සිදුකර තිබේ.

දෙමෝදර පාළම චිත්‍රපටයේ කථා සංඛල්පයද ටෙනිසන් කුරේ මහතාගේ වන අතර එම චිත්‍ර පටය සදහා ඔහු විසින් ගීත දෙකක්ද රචනා කර තිබේ.

කැප්ටන් කූල් හා සිවම්මා ධනපාල ඇතුළු වේදිකා නාට්‍ය කිහිපයක්ද ඔහු විසින් අධ්‍යක්‍ෂණය කර ඇත.
 

ටෙනිසන් කුරේ මහතාගේ දේහය පිළිබඳ අවසන් කටයුතු මොරටුව, මෙතෝදිස්ත දේවස්ථාන සුසාන භූමියේ දී හෙට (1) පස්වරු 4.00ට සිදුකිරීමට නියමිතය.