ගෝලීයව ව්‍යාප්ත වෙමින් තිබෙන කෝවිඩ්-19 හෙවත් නව කොරෝනා වයිරසයෙන් පුද්ගලයන් තිදෙනකු මියගොස් ඇතැයි බෙල්ජියම අද (11) පළමුවරට නිවේදනය කළේය.

බෙල්ජියමෙන් පළමුවරට මරණ වාර්තා වන අතරවාරයේදී යුරෝපා කොමිසමේ නිලධාරීන් සිවුදෙනකු ද අසනීප වී ඇතැයි එම කොමිසමේ නිලධාරීහු කීහ.

අවුරුදු 73ක පුද්ගලයකු සහ වයස අවුරුදු 90ක කාන්තාවක බ්‍රසල්ස් නුවර රෝහල්වල ප්‍රතිකාර ලබමින් සිටියදී මියගිය බවත් 86 හැවිරිදි තවත් පුද්ගලයකු අගනුවරට දකුණු දෙසින් පිහිටි රෝහලක ප්‍රතිකාර ලබමින් සිටියදී මියගිය බවත් බෙල්ජියමේ සෞඛ්‍ය අමාත්‍යාංශය නිවේදනය කළේය.

‘‘රෝහල්වල සිටින ආසාදිතයන්ගේ ගණන වැඩිවෙමින් තිබෙනවා. විශේෂයෙන්ම හුස්ම ගැනීමේ අපහසුතා තිබෙන රෝගීන්ගේ වැඩිවීමක් දක්නට ලැබෙනවා. කොරෝනා වයිරසය රට තුළ වසංගතයක් බවට පත්වීමේ ලක්ෂණ පෙන්නුම් කරනවා’’ යැයි ද සෞඛ්‍ය අමාත්‍යාංශය නිකුත් කළ නිවේදනයේ දැක්විණි.

‘‘අපි අපේ පුරවැසියන් ආරක්ෂා කර ගත යුතුයි. විවිධ රෝගාබාධ තිබෙන පුද්ගලයන්, සෞඛ්‍ය සම්පන්න නැති සහ වැඩිහිටියන් විශේෂයෙන් ආරක්ෂා කරගන්න ඕනෑ’’ යැයි ද එහි සඳහන් විණි.

සුරක්ෂා නිවහන්, ඇතැම් රෝහල්, සුරක්ෂා මධ්‍යස්ථාන යනාදිය පිටස්තර පුද්ගලයන්ට තහනම් කිරීමට බෙල්ජියමේ බලධාරීන් පියවර ගෙන අතර දහසකට වඩා රැස්වන ස්ථාන හෝ විවිධ උත්සව හා ඉසව් තහනම් කරන්නැයි බලධාරීන් බෙල්ජියමේ නගරාධිපතිවරුන්ට උපදෙස් දී ඇත.

අද වනවිට බෙල්ජියමෙන් වාර්තා වන කොරෝනා ආසාදිතයන්ගේ ගණන 314ක් දක්වා ඉහළ ගොස් ඇති අතර ඊයේ එම ආසාදිතයන්ගේ ගණන සටහන් වූයේ 267ක් ලෙසය.

ඒ.එෆ්.පී

055