(රංජන් කටුගම්පොළ සහ තිළිණි ද සිල්වා)
 
හෙට දින (21) පැවැත්වීමට නියමිත ශ්‍රී ලංකා ක‍්‍රිකට් නිලවරණය වළකාලන වාරණ නියෝගයක් නිකුත් කරන ලෙස ඉල්ලා ශ්‍රී ලංකා ක‍්‍රිකට් නිලවරණය සඳහා නාමයෝජනා යොමු කළ දෙදෙනෙකු විසින් ඉදිරිපත් කරන ලද රිට් පෙත්සම මූලික ගැටලූව අද (20) අභියාචනාධිකරණ්‍ය හමුවේ සමතයකට පත්විය.

පෙත්සම්කරුවන් දෙදෙනාට තනතුරු වලට තරග වැදීමට අවසර දීමට ක‍්‍රීඩා අමාත්‍යවරයා එකඟ වන බව දැනුම් දීමෙන් පසු සියලූ පාර්ශවකරුවන් එකඟත්වයට පත්වීමෙන් පසුව මෙය සමථය ඇති විය.

මෙම පෙත්සම අභියාචනාධිකරණ වැඩබලන සභාපති විනිසුරු දීපාලි විජේසුන්දර සහ අර්ජුන ඔබේසේකර යන මහත්ම මහත්මීන් ගෙන් සමන්විත අභියාචනාධිකරණ විනිසුරු මඩුල්ලක් හමුවේ සළකා බැලිණි.

මෙම පෙත්සම අධිකරණය හමුවේ කැඳවූ අවස්ථාවේදී ක‍්‍රීඩා අමාත්‍යවරයා වෙනුවෙන් පෙනී සිටි අතිරේක සොලිසිටර් ජනරාල් ජනාධිපති නීතීඥ සංජය රාජරත්නම් මහතා පැවසුවේ අමාත්‍යයවරයා මෙම පෙත්සමේ පළමු පෙත්සම්කරුට ලේකම් ධූරය සඳහාත් , දෙවැනි පෙත්සම්කරුට උප සභාපති ධූරය සඳහාත් තරග කිරීමට කැමැත්ත පළ කර ඇති බවය.

ඊට අනෙකුත් පාර්ශවකරුවන්ද එකඟ වූහ. ඒ අනුව පෙත්සම සමතයකට පත්විය. මෙම පෙත්සම ලබන මාර්තු 21 වැනි දා යළි කැඳවන ලෙසද නියෝග කෙරිණි.

වත්තල හැඳල මොහාන් ද සිල්වා සහ රවීන් වික‍්‍රමරත්න යන මහත්වරුන් විසින් ගොනු කරන ලද පෙත්සමේ වගඋත්තරකරුවන් හැටියට ක‍්‍රීඩා අමාත්‍ය හරීන් ප‍්‍රනාන්දු , ශ්‍රී ලංකා ක‍්‍රිකට් ආයතනයේ නිසි බලධාරියා සහ ශ්‍රී ලංකා ක‍්‍රිකට් ආයතනය නම් කරනු ලැබ ඇත.