විනීතා එම් ගමගේ

කම්කරු නීති රීති එකම නීතියක් යටතට ගෙන ඒම සඳහා කම්කරු දෙපාර්තමේන්තුව ගෙන ඇති තීරණය යටතේ ඉදිරිපත් කර ඇති යෝජනාවලියට ජාතික කම්කරු උපදේශක සභාව නියෝජනය කරන වැඩකරන ජනතාවගේ වෘත්තිය සමිතිවල දැඩි විරෝධය එල්ල වී ඇත.

ජාතික කම්කරු උපදේශක සභාව ඉකුත් 9 දා පස්වරුවේ රැස්ව ඇති අතර එම රැස්වීම විශේෂ රැස්වීමක් ලෙස කැඳවා ඇත්තේ කම්කරු කොමසාරිස් ජනරාල් ඒ විමලවීර මහතා විසිනි.

සාමාන්‍යයෙන් කම්කරු අමාත්‍යවරයාගේ ප‍්‍රධානත්වයෙන් මෙම සභාව රැස්වන නමුත් මෙම රැස්වීමට කම්කරු අමාත්‍යවරයා හෝ අමාත්‍යංශ ලේකම්වරයා පැමිණ නොසිටි බව ඊට සහභාගි වන වෘත්තීය සමිති නායකයෝ පිරිසක් පැවැසූහ.

ඒ අනුව කම්කරු කොමසාරිස් ජනරාල්වරයාගේ ප‍්‍රධානත්වයෙන් වෘත්තිය සමිති හා හාම්පුතුන් කැඳවා පැවැත්වූ එම රැස්වීමේ දී කම්කරු කොමසාරිස් ජනරාල්වරයා විසින් එම දෙපාර්තමේන්තුව සැකසූ නව නීති කෙටුම්පත ඉදිරිපත් කර ඇති අතර රැස්වීමට සහභාගීවූ කම්කරුවන් නියෝජනය කරන වෘත්තිය සමිති දැඩි විරෝධය පළ කර ඇත.

හොර රහසේ සකසා එළියට දෙන නීති කෙටුම්පතකට කිසිසේත්ම එකඟ විය නොහැකි බවත් හාම්පුතුන්, වෘත්තීය සමිති හා නිලධාරින් එක්ව එක මේසයක සිට මෙවැනි නීති කෙටුම්පතක් සඳහා කරුණු එක් කළ යුතු බව එම සභා රැස්වීමට සහභාගී වී සිටි වැඩ කරන ජනතාවගේ වෘත්තිය සමිති 14 ම එක හඬඩින් පැවසූ බව අන්තර් සමාගම් සේවක සංගමයේ සභාපති වසන්ත සමරසිංහ මහතා සමාජ හා සාමයික කේන්ද්‍රයේ දී අද (10) පැවති මාධ්‍ය හමුවක දී පැවසීය.

හොර රහසේ සකසා ගෙනැවිත් ඉදිරිපත් කරන මෙවැනි කෙටුම්පතකට වැඩ කරන ජනතාව නියෝජනය කරන වෘත්තිය සමිති ලෙස කිසිසේත්ම සහහෝගය දිය නොහැකි බව කී සමරසිංහ මහතා දැනට සකසා ඉදිරිපත් කර ඇති කෙටුම්පත පිළිබඳව පුළුල් අධ්‍යයනයක් සිදුකර ඒ පිළිබඳ වෘත්තීය සමිතිවල මතය ජාතික කම්කරු උපදේශක සභාවට ඉදිරිපත් කරන බව ද හෙතෙම සඳහන් කළේය.

අන්තර් සමාගම් සේවක සංගමය කැඳවා තිබු මෙම මාධ්‍ය හමුවට නිදහස් වෙළඳ කලාප පොදු සේවා සේවක සංගමයේ සම ලේකම් ඇන්ටන් මාකස්, ලංකා වෘත්තිය සමිති සම්මේලනය වෙනුවෙන් චමින්ද පෙරේරා සහ එක්සත් කම්කරු සම්මේලනයේ සභාපති ලීනස් ජයතිලක යන මහත්වරු සහභාගී වූහ.