( +++ සුජිත් හේවාජුලිගේ)

කෝප් කමිටුව හමුවට කැඳවීම පසුවට කල් දමන්නැයි ශ්‍රීලංකන් ගුවන් සමාගමේ ප්‍රධානීන් කළ ඉල්ලීමක් එම කමිටුවේ සභාපති ජවිපෙ පාර්ලිමේන්තු මන්ත්‍රී සුනිල් හඳුන්නෙත්ති මහතා විසින් ප්‍රතික්ෂේප කර ඇතැයි වාර්තා වෙයි.

ආන්දෝලනාත්මක එයාර්බස් ගනුදෙනුව සම්බන්ධයෙන් සාකච්ඡා කිරීමට කෝප් කමිටුව හමුවේ ලබන 19 වැනිදා බදාදා පෙනී සිටින්නැයි එම කමිටුව ශ්‍රීලංකන් සමාගමේ ප්‍රධානීන්ට පසුගියදා දැනුම් දුන්නේය.

එසේ දැනුම් දුන් පසුව ශ්‍රීලංකන් සමාගමේ ප්‍රධානීන් සුනිල් හඳුන්නෙත්ති මහතා අමතා සිද්ධිය පිළිබඳව තවදුරටත් අධ්‍යයනය කළ යුතු නිසා කමිටුව හමුවට ඒමට වෙනත් දිනයක් ඉල්ලා ඇත.

එම ඉල්ලීම තරයේ ප්‍රතික්ෂේප කර ඇති හඳුන්නෙත්ති මහතා 19 වැනිදා හැර වෙනත් දිනයක් ලබාදීමට හැකියාවක් නැතැයි දන්වා ඇත.

ශ්‍රීලංකන් සමාගමේ වත්මන් පාලකයන් සමාගම බාරගැනීමට පෙර සිදු වූ සිද්ධියක් විගණන වාර්තා පදනම් කරගෙන සාකච්ඡා කිරීමට අමතර කාලයක් ගැනීමේ අවශ්‍යතාවක් නැතැයි ද පැමිණීමට නොහැකි නම් ඇත්ත හේතුව කියන්නැයි ද කෝප් සභාපතිවරයා ගුවන් සමාගම් ප්‍රධානීන්ට මෙහිදී දැනුම් දී ඇතැයි දැනගන්නට තිබේ.

මේ සම්බන්ධයෙන් සුනිල් හඳුන්නෙත්ති මහතාගෙන් ඊයෙ කළ විමසුමකදී ඔහු පැවැසුවේ ශ්‍රීලංකන් ගුවන් සමාගමේ නිලධාරීන් කෝප් කමිටුව හමුවට කැඳවන දිනය කිසිවිටෙකත් වෙනස් නොකරන බවය.

මේ අතර ගුවන් සමාගමේ ආන්දෝලනාත්මක ගුවන් බස් ගනුදෙනුව සම්බන්ධයෙන් තවත් වාර්තා ඇත්නම් ඒවා නොපමාව ලබාදෙන ලෙස කෝප් කමිටු සභාපතිවරයා රජයේ විගණකාධිපතිවරයාට දැනුම් දී ඇත.

මේ සම්බන්ධයෙන් කෝප් කමිටු සභාපතිවරයා හා රජයේ විගණකාධිපතිවරයා අතර සාකච්ඡාවක් ලබන 18 වැනිදා පැවැත්වීමට නියමිතය.

ආන්දෝලනාත්මක ගුවන් බස් ගනුදෙනුව සම්බන්ධයෙන් සභාව කල්තබන අවස්ථාවේ විවාදයක් ලබන 20 වැනිදා මැතිබසයේදී පැවැත්වේ.

මේ අතර විවිධ ගනුදෙනු සම්බන්ධයෙන් සාකච්ඡා කිරීමට විදේශ සේවා නියුක්ති කාර්යාංශයේ ප්‍රධානීන් ලබන 18 වැනිදාත් ශ්‍රී ලංකා ක්‍රිකට් ආයතනයේ ප්‍රධානීන් ලබන 19 වැනිදාත් කෝප් කමිටුව හමුවට කැඳවා ඇත.