(ඔගස්ටින් ප්‍රනාන්දු)     
 
වනාතවිල්ලුව අරුවක්කාලු කසළ අංගනය වෙත කොළඹ සිට කසළ ගෙන එන රථවල ආරක්ෂාවට යුද හමුදා හා පොලිස් නිලධාරීන් 55දෙනෙකුගෙන් යුතු කණ්ඩායමක් යොදවා ඇතැයි පුත්තලම පොලිස් අධිකාරි චන්ද්‍රසේන ජයකොඩි මහතා සඳහන් කළේය. 
 
මින් ඉදිරියේ දි කිසිදු බාධාවකින් තොරව කසළ ප්‍රවාහනය කිරීමට හැකි වන සේ එම පියවර ගත් බවද ඒ මහතා පැවසීය. කසළ ප්‍රවාහන රථවලට කිසියම් ප්‍රහාරයක් කළහොත් සැකකරුවන් පොදු දේපල හා ත්‍රස්තවාදය වැළැක්වීමේ පනත යටතේ අධිකරණය වෙත ඉදිරිපත් කර ඔවුන් රිමාන්ඩ් බන්ධනාගාර ගත කිරීමට පියවර ගන්නා බවද පුත්තලම පොලිස් අධිකාරීවරයා කීය.
 
කොළඹ සිට කසළ රැගෙන එන සියලු වාහන මුන්දලම ප්‍රදේශයේ රඟවා ගෙන අරුක්වකාලු දක්වා ඒකාබද්ධව ගමන් කිරීමට පියවර ගන්නා බවත් පොලිස් අධිකාරි චන්ද්‍රසේන ජයකොඩි මහතා සදහන් කළේය.
 
කොළඹ කසළ දැමීමට ස්ථානයක් නොවූ බැවින් එහි එකතු වන සියලු කසළ අරුක්කාලු අංගනය වෙත ගෙන යාමට පියවර ගත් අතර මේ නිසා ඇතැම් පුද්ගලයින් සිය දේශපාලන අවශ්‍යතා ඉටු කර ගැනීමේ අරමුණින් කසළ ප්‍රවාහනයට එරෙහිව විරෝධතාවක් ඇති කිරීමට නොමග යවන ලද මහජන කණ්ඩායම් යොදවා තිබිණි. ඒ අනුව කුපිත වු පිරිස් ස්ථාන පහක දි කසළ ප්‍රවාහනය කරමින් තිබූ වාහනවලට ගල් මුල් ප්‍රහාර එල්ල කිරීම් සිද්ධීන් වාර්තා විය. 
 
මෙහිදී පුත්තලම පොලිසියේ ජීප් රථයේ ඉදිරි රාමුව ට ද හානිවු බවත් මෙම සියලු සිද්ධීන් සිදු කළ පුද්ගලයින් අත්අඩංගුවට ගෙන අධිකරණය හමුවට ඉදිරිපත් කළ බවත් වාර්තා විය. ඉන් සිව්දෙනෙකු සාමාන්‍ය නීතිය යටතේ අධිකරණය හමුවට ඉදිරිපත් කළ අතර ඒ අනුව ඔවුන්ට ඇප නියම විය. එක් සිද්ධියක් සම්බන්ධයෙන් අත්අඩංගුවට ගත් පුද්ගලයා පොදු දේපළ පනත යටතේ අධිකරණයට ඉදිරිපත් කර රිමාන්ඩ් භාරයට පත් කර ඇත.