2022 ජුනි මස 27 වන සඳුදා
(තිළිණි ද සිල්වා සහ රංජන් කටුගම්පොළ)
කොළඹ වරාය පර්යන්තයේ සහ කටුනායක අපනයන සැකසුම් කලාපයේ රඳවා තිබෙන එක්සත් රාජධානියේ සිට මෙරටට ආනයනය කර ඇතැයි කියන සායනික අපද්‍රව්‍ය සහිත කැළි කසල අඩංගු කන්ටේනර් යළි එරටට යවන ලෙසට නියෝග කරන ලෙස ඉල්ලා පාරිසරික යුක්ති කේන්ද්‍රය ගොනු කළ පෙත්සම් සම්බන්ධයෙන් නොතීසි නිකුත් කරනවාද නැත්ද යන්න පිළිබඳ නියෝග හෙට (31) ප‍්‍රකාශයට පත් කරන බව අභියාචනාධිකරණය එම පෙත්සමේ පාර්ශ්වකරුවන්ට අද (30) දැනුම් දුන්නේය.
අධිකරණය මෙසේ දැනුම් දුන්නේ මීට අදාළ රිට් පෙත්සම සම්බන්ධයෙන් දෙපාර්ශවය විසින් ඉදිරිපත් කළ දීර්ඝ කරුණු සලකා බැලීමෙන් පසුවය.
මෙම පෙත්සම අභියාචනාධිකරණ සභාපති යසන්ත කෝදාගොඩ සහ අර්ජුන ඔබේසේකර යන මහත්වරුන් හමුවේ කැඳවිණි.
පාරිසරික යුක්ති කේන්ද්‍රයේ විධායක අධ්‍යක්ෂ හේමන්ත සිසිර කුමාර මහතා විසින් ගොනු කර ඇති මෙම පෙත්සමෙහි වගඋත්තරකරුවන් ලෙස මධ්‍යම පරිසර අධිකාරියේ රේගු අධ්‍යක්ෂ ජනරාල් සහ නීතිපති නම් කරනු ලැබ ඇත.
