(බිඟුන් මේනක ගමගේ) 


මිලේනියම් චැලේන්ජ් කෝපරේෂන්(එම්.සී.සී) ගිවිසුම අධ්‍යයනය කිරීම සඳහා පත්කළ සිව් පුද්ගල කමිටුව අගමැති හා මුදල් ඇමැති මහින්ද රාජපක්ෂ මහතා අද(23) මුණගැසී තිබේ.


කොළඹ විශ්ව විද්‍යාලයේ ආර්ථික විද්‍යා අධ්‍යයනාංශයේ ආචාර්ය ලලිතසිරි ගුණරුවන් මහතාගේ සභාපතිත්වයෙන් යුතු මෙම කමිටුව අගමැතිවරයා මුණගැසී තිබෙන්නේ ගිවිසුමට අදාළ මුල් ලේඛන ඉල්ලා සිටීමටය.


එම්.සී.සී ගිවිසුම යැයි සඳහන් ලේඛන ඩිජිටල් හා මුද්‍රිත ස්වරූපයෙන් විවිධ මූලාශ්‍රවල සඳහන්ව ඇතත් ඒවායේ නිරවද්‍යභාවය සම්බන්ධයෙන් විවිධ අදහස් පවතින බැවින් එහි මුල් ලේඛන ඉල්ලාසිටීමට කමිටු සාමාජිකයන් කටයුතු කර ඇතැයි විශ්වසනීය ආරංචි මාර්ග සඳහන් කරයි.


අදාළ ලේඛන කමිටුවට සම්පාදනය කරදීමට අගමැති මහින්ද රාජපක්ෂ මහතා එහිදී පොරොන්දු වී ඇති අතර ඒ අනුව ලබන සතියේ පමණ කමිටු සාමාජිකයන් රැස්ව එම්.සී.සී ගිවිසුම අධ්‍යයන කටයුතු ආරම්භ කිරීමට නියමිත යැයි එම ආරංචි මාර්ග සඳහන් කරයි. 


අමාත්‍ය මණ්ඩල තීරණයක් අනුව මෙම සිවු පුද්ගල කමිටුව පත්කරනු ලැබුවේ එම්.සී.සී ගිවිසුම අස්සන් කිරීම තාවකාලිකව අත්හිටුවමිනි.


මහාචාර්ය ලලිතසිරි ගුණරුවන් මහතාගේ සභාපතිත්වයෙන් යුත් මෙම කමිටුවේ ඩී.එස්.ජයවීර (ප්‍රවාහන අමාත්‍යාංශයේ හිටපු ලේකම්), ජනාධිපති නීතීඥ නිහාල් ජයවර්ධන, නාලක ජයවීර මහත්වරු සෙසු සාමාජිකයෝ වෙති.