(අජිත්ලාල් ශාන්තඋදය සහ පැල්ඩුල්ල අරුණ එස් හේරත්)

දොගොඩතලා යමින් තිබූ කිරිඳිගඟේ පැල්මඩුල්ල නගරයට පානීය ජලය සපයන ජල මූලාශයට ද ඉහළින් පිහිටි කුට්ටාපිටියේ, වටවල ඉමේකැලේ සපත්තු පාලම අවට සිටි ජනතාවගේ විරෝධය ද නොතකා එගොඩ වෙද්දී ජල පහරට හසුව ගසා ගොස් සිවුදරු පියාගේ සිරුර තවමත්  හමු නොවු බව පැල්මඩුල්ල පොලිසිය පවසයි.

වටවල ඉමේකැලේ පදිංචිව සිටි 55 හැවිරිදි ඉමේකැලේ අලංකාරගේ රෝබෝසිඤ්ඤෝ යන අය මෙසේ අතුරුදන්ව ඇත.

අතුරුදන් තැනැත්තා පැල්මඩුල්ල නගරයට ගොස් ආපසු පැමිණෙද්දී මෙම අනතුරට මුහුණ පා ඇති බවට තොරතුරු ලැබුණු බව පැල්මඩුල්ල පොලීසිය පැවසීය.

පැය කිහිපියක් තිස්සේ පැවති අධික වැස්සත් සමග ප්‍රදේශයේ ඇලදොලවල්වල ජල මට්ටම් සීඝ්‍රයෙන් ඉහළ ගොස් තිබුණි. පැල්මඩුල්ල නගරයට ජලය සපයන ජලමූලාශ්‍රය වූ කිරිඳි ගඟද  අඩි 4කට වඩා ජල මට්ටම ඉහළ ගිය බව ප්‍රදේශවාසීහු කීහ.

වටවල ඉමේකැලේ ගමේ සිට පැල්මඩුල්ල දෙසට එන අයත් පැල්මඩුල්ල සිට ඉමේකැලේ ගමට යන අයත් කිරිඳි ගඟ ඉවුරේ සපත්තු පාලම දෙපැත්තේ බලාසිටියදී මෙම සිද්ධියට වූ බව ඇසින් දුටුවෝ කීහ.

පැල්මඩුල්ල නගරයට පානීය ජලය සපයන ජල මූලාශ්‍රය ඇත්තේද මෙම තැනැත්තා අතුරුදන්වූ ස්ථානයට පහළින් බව පොලීසිය පැවසීය. සුප්‍රසිද්ධ ‘කිරිඳි ඇල්ල’ ඇත්තේ ද ඊටත් පහළිනි. රොබෝසිඤ්ඤෝ මහතා අතුරුදන්වූ පාලමට පැල්මඩුල්ල නගරයේ සිට කිලෝමීටර් 8ක් පමණ ඇතිබව ප්‍රදේශවාසීහු වැඩිදුරටත් පැවසූහ.

කිරිඳිගඟේ ජල මට්ටම යම් ප්‍රමාණයකින් අඩුව ඇති නමුත් එහි බැසීම තරමක් අවදානම් නිසා ඉවුරු දෙපැත්තේ සිට සෝදිසි කළද තවමත් සිරුර හමු නොවූ බව පැල්මඩුල්ල පොලිසිය සඳහන් කරයි.