(නිමල කොඩිතුවක්කු)
          
කඩා වැටුණු ආර්ථිකය, සංවර්ධනය නගා සිටුවමින්  එක්සත් ජාතික පෙරමුණු රජයක් තුළින් සෑම අංශයකින්ම රට නගා සිටුවීමට කටයුතු කරන බව එක්සත් ජාතික පක්ෂ මහලේකම් අකිල විරාජ් කාරියවසම් මහතා පැවැසීය.

එක්සත් ජාතික පෙරමුණු රජයේ ඉදිරි වැඩපිළිවෙළ මගින් ප‍්‍රජාතන්ත‍්‍රවාදය තවදුරටත් ශක්තිමත් කරමින්  රටේ සියලූ ජනතාවගේ ගැටලූ විසඳීමට අවශ්‍ය ක‍්‍රියාමාර්ග ගන්නා බවද මහලේකම්වරයා සඳහන් කළේය.

කොළඹ අරලියගහ මන්දිරයේ පැවති මාධ්‍ය හමුවකට එක්වෙමින් ඔහු මේ බව පැවසීය.

එහිදී වැඩිදුරටත් අදහස් දැක්වූ එක්සත් ජාතික පක්ෂ මහලේකම් අකිල විරාජ් කාරියවසම්මහතා මෙසේ ද කීවේය.

‘‘යුක්තියේ සටන ජයග‍්‍රහණයේ සැමරුම අපි 17 වැනි දා සඳුදා සමරනවා. ප‍්‍රජාතන්ත‍්‍රවාදය  වෙනුවෙන් ආරම්භ කළ මේ සටන අපි ජයග‍්‍රහණය කළා. මේ ජයග‍්‍රහණය එක්සත් ජාතික පක්ෂයේ  ජයග‍්‍රහණය නෙමෙයි. මේ ජයග‍්‍රහණය රටේ ජනතාවගේ ජයග‍්‍රහණයයි.

පසුගිය මාස එකමහාර දෙක කාළය තුළ අරලියගහ මන්දිරයේ රැඳී සිටිමින් අපි මේ සටන ගෙනගියා. රනිල් වික‍්‍රමසිංහ මහතාගේ සිට ප‍්‍රජාතන්ත‍්‍රවාදය අගය කරන රටේ සියලූම ජනතාව අපි සමග ඒ වෙනුවෙන් අත්වැල් බැඳ ගත්තා.

අපි මේ සටන ආරම්භ කරද්දී අපි දැනගෙන හිටියේ නැහැ මේ සටන කොහෙන් අවසන් වෙයිද කියලා.  නමුත් අපි අවසානයේදී මේ සටන ජයග‍්‍රහණය කළා.  පක්ෂ පාට බේදයකින් තොරව සියලූම දෙනාට අපි ආරාධනා කරනවා මෙම ජයග‍්‍රහණය සමරන්න එන්න කියලා.

අපි ඇතිකරපු ස්වාධින අධිකරණ පද්ධතිය නිසා අපිට පුලූවන් වුනා  සාධාරනය ඉටුකර ගන්න. අපිට පුලූවන් වුනා ආන්ඩුක‍්‍රම ව්‍යවස්තාව ආරක්ෂා කරගනිමින්  ජනතාවගේ අයිතිය දිනා ගන්න.
මේ ජයග‍්‍රහණය වෙනුවෙන් සමාජ ජාලා, මාධ්‍ය අපිට කිසිදු වාසියක් ප‍්‍රයෝජනයක් නොගෙන අපිට උදව් කළා. එක්සත් ජාතික පක්ෂයේ මහලේකම්වරයා  වශයෙන් ඒ සියලූම දෙනාට අපේ ස්තූතිය පළ කරනවා.

දැන් අලියා ඉස්සරහට ඇවිත් තියෙනවා. අද අපි ශක්තිමත් මට්ටමක ඉන්නවා. අපේ සංවිධානාත්මක  ජාලය සක‍්‍රීයව ක‍්‍රියාත්මක වෙනවා. 

පහුගිය වසර තුනහමාරක කාලය තුළ අපි මාධ්‍යයට විශාල නිදහසක් ලබා දුන්නා.  අතීතයේ වගේ මාධ්‍ය ආයතන ගිනි තියන්න, මාධ්‍යවේදින්ට සුදුවෑන් යවන්න අපි කටයුතු කලේ නැහැ. සමහර විට මාධ්‍යයෙන්  වැඩියෙන්ම විවේචනය වුනේ ආණ්ඩුවේ අපියි.