(එෆ්.අස්ලම් සහ විජයරත්න රත්නායක)
 
ඌව පළාත් ප්‍රධාන අමාත්‍ය චාමර සම්පත් දසනායක මහතා පළාත් සෞඛ්‍ය සේවා අධ්‍යක්ෂ ජනිතා තෙන්නකෝන් මහත්මියට කරන ලද තර්ජනාත්මක බැණවැදීමකට එරෙහිව ඌව පළාත් රජයේ වෛද්‍යවරු වර්ජනයක් ක්‍රියාත්මක කිරීමට සැරසෙති.
  
දෙමෝදර දිසා රෝහල මැදින් මාර්ගයක් ඉදිකිරීමට යාමේදී රෝහල් බලධාරීන්ගෙන් සහ සෞඛ්‍ය අධ්‍යක්ෂවරියගෙන් ලද විරෝධය මත ඌව පළාත් ප්‍රධාන අමාත්‍යවරයා සෞඛ්‍ය සේවා අධ්‍යක්ෂවරිය සිය කාර්යාලයට කැඳවා බැණවැදී ඇතැයි රජයේ වෛද්‍ය නිලදාරීන්ගේ සංගමයේ ඌව පළාත් ලේකම් වෛද්‍ය පාලිත රාජපක්ෂ මහතා පැවසීය.
 
 වෛද්‍යවරයා මේ බව ප්‍රකාශ කළේ බදුල්ල පළාත් මහ රෝහලේ අද (29) කැදවූ ප්‍රවෘත්ති සාකච්ඡාවකදීය.
  
නිවාස කිහිපයකට යාම සඳහා මාර්ගයක් ඉදිකිරීමට යාමේදී දෙමෝදර දිසා රෝහල් භූමියෙන් ඉඩකඩ ගැනීමටයාමේදී මෙම ගැටළුකාරී තත්වය මතු ව තිබේ. මාර්ගය ඉදිකිරීමට අවශ්‍ය ඉඩකඩ ලබාදෙන්නැයි රෝහල් හා සෞඛ්‍ය  බලධාරීන්‍ට බලකරමින් ගම්වාසීන් ද විරෝධතාවක නිරත වී ඇති අතර දෙමෝදර දිස්ත්‍රික් වෛද්‍ය නිලධාරීවරයාගේ නිල නිවසටද පහර දී ඇත.
 
 දිස්ත්‍රික් වෛද්‍ය නිලධාරීවරයා මේ සම්බන්ධයෙන් ඇල්ල පොලිසියටද පැමිණිලි කර ඇති අතර රජයේ වෛද්‍ය නිලධාරීන්ගේ සංගමය රැස්ව ගත් තීරණයට අනුව දෙමෝදර රෝහලේ රාජකාරියේ නිරත වෛද්‍යවරුන් තිදෙනාම රාජකාරියට නොයාමටද තීරණය කර ඇත.
 
මේ වනවිට එම රෝහලේ කිසිදු වෛද්‍යවරයෙකු රාජකාරියේ නිරතව නොසිටින බවද වෛද්‍ය පාලිත රාජපක්ෂ මහතා සඳහන් කළේය.
 
ප්‍රධාන අමාත්‍යවරයා ඌව පළාත් සෞඛ්‍ය සේවා අධ්‍යක්ෂවරියගෙන් පොදුවේ සමාව ගතයුතු බවත් නොඑසේ නම් ඌව පළාතේ සිටින වෛද්‍යවරුන් ලබන 01 වනදා වැඩවර්ජනයක නිරතවනු ඇති බවත් රාජපක්ෂ මහතා පැවසීය.