(ඩයනා උදයංගනී)

දිවයිනේ පළාත් කිහිපයකට ඉදිරි පැය කිහිපයේදී ගිගුරුම් සහිත තද වැසි සමඟ අකුණු අනතුරු ඇතිවීමේ හැකියාවක් ඇතැයි කාලගුණ විද්‍යා දෙපාර්තමේන්තුව පවසයි.

විශේෂයෙන්ම බස්නාහිර, මධ්‍යම සබරගමුව, දකුණු, ඌව සහ වයඹ පළාත්වලට මිලිමීටර 100 ක පමණ තද වැසි ඇතිවිය හැකි බව කාලගුණ විද්‍යා දෙපාර්තමේන්තුවේ අනාවැකිකරණ අංශයේ නියෝජ්‍ය අධ්‍යක්‍ෂ මෙරිල් මෙන්ඩිස් මහතා පැවසීය.

සෙසු පළාත්වලද මිලිමීටර 75ක පමණ වැසි ඇතිවිය හැකි බව ඔහු සඳහන් කළේය.

ඉදිරි දිනවලදීද මෙම වැසි තත්ත්වය බලාපොරොත්තු වන අතර විටින් විට අඩු වැඩි වෙමින් නොවැම්බර් මස දෙවැනි සතිය දක්වාම දිවයිනේ බොහෝ ප‍්‍රදේශයන්ට වැසි ඇතිවනු ඇතැයි ඔහු කීවේය.

ගිගුරුම් සහිත වැසි ඇතිවන අවස්ථාවලදී තාවකාලික තද සුළං සහ අකුණු අනතුරුද ඇතිවිය හැකි බැවින් අනතුරු අවම කරගැනීමට ක‍්‍රියාකරන්නැයි කාලගුණ විද්‍යා දෙපාර්තමේන්තුව ජනතාවට දැනුම්දීමක් කරයි.

අකුණු සහ ගිගුරුම් සහිත වැසි පවතින අවස්ථාවලදී එළිමහනේ සිටීමෙන් වැළකීම, කුඹුරු, තේ වතු, ක‍්‍රීඩා පිටි, ජලාශ වැනි විවෘත ස්ථානවල රැඳීමෙන් වැළකීම, රැහැන් සහිත දුරකථන සහ විදුලියට සම්බන්ධ කරන ලද විදුලි උපකරණ භාවිතයෙන් වැළකී සිටීම ආදී ආරක්‍ෂිත ක‍්‍රියාමාර්ග අනුගමනය කරන ලෙස ද එම දෙපාර්තමේන්තුව පවසයි.

මේ අතර අද (20) පෙරවරු 8.30න් අවසන් වූ පැය 24ක කාලයේදී දිවයිනේ වැඩිම වර්ෂාපතනය ලෙස මිලිමීටර 110.8 ක වර්ෂාපතනයක් යාපනය දිස්ත‍්‍රික්කයේ අච්චුවේලි ප‍්‍රදේශයෙන් වාර්තා වී ඇත.