(තිළිණි ද සිල්වා)
 
ඇමෙරිකාවේ කැලිෆෝනියාහී නගරබද ප‍්‍රදේශයකදී  සිදුවූ මංකොල්ලකෑමකදී වෙඩි ප‍්‍රහාරකට ලක්ව ඒ අසළ සිටි ශ්‍රී ලාංකිකයකු මියගොස් ඇතැයි තානාපති ආරංචි මාර්ග සඳහන් කර සිටී.
 
මෙලෙස මියගොස් ඇත්තේ 32 හැවිරිදි වියේ පසුවූ ජනත් ලියනගේ නමැත්තෙකි. මොහු කාලයක පටන් අමෙරිකාවේ පදිංචි අයෙකු යැයිද පැවසේ.
 
එම ලාංකිකයා කැලිෆෝනියාහී ඔක්ලන්ඞ් නගරබද ප‍්‍රදේශයේ 20වැනි මාවතේදී සිදුවූ සොරකමක් අතරතුර වෙඩිවැදීමෙන් පසුගිය 25 වැනිදා බරපතල තුවාල ලබා ඇතැයිද එම තානාපති ආරංචි මාර්ග කියා සිටී.
 
පසුව ඔහුව කඩිනමින් රෝහල් ගත කිරීමට එරට ආරක්ෂක සේවා නිලධාරීහු පියවර ගෙන තිබුණි. රාත‍්‍රි 11.14ට පමණ ඔහුට වෙඩි වැදී තිබූ අතර ඒ සම්බන්ධයෙන් ඇමෙරිකා ආරක්ෂක අංශ පරීක්ෂණ පැවැත්වූහ.
 
කැලිෆෝනියා හි රෝහලක දැඩි සත්කාර ඒකකයේ ප‍්‍රතිකාර ලැබූ ඔහු ඊට පසුදින අලුයම මිය ගියේය.
 
වෙනත් පෙදෙසක පදිංචිව සිටින මෙම තැනැත්තා මෙම ස්ථානයට ගියේ ඇයිද යන්න මෙතෙක් තහවුරු කරගෙන නැතත් , මිය යන විට ඔහු සිය වාහනය ඉදිරිපසසිට ඇති බවත් සොරකම කර පලායන්නන් ඔහුට වෙඩිතබන්නට ඇති බවත් එරට පොලිසීය සැක පල කර සිටී. 
 
කෙසේ වෙතත් ශ්‍රී ලාංකිකයාට වෙඩි තැබූ ඝාතකයා සොයාදෙන අයකුට මුදල් ත්‍යාගයක් පිරිනමන බව ඇමෙරිකා පොලීසිය මේවනවිටත් නිවේදනය කර ඇති අතර සැකකරුවන් සොයා පොලිස් විමර්ශන තවදුරටත් ක‍්‍රියාත්මකය.