(නිමල කොඩිතුවක්කු)

රැකියා ලබා දෙන බවට පවසමින් උපාධිධාරීන් රැවටීමට ආණ්ඩුව ගත් උත්සාහයට එරෙහිව සියලුම උපාධිධාරීන් ආණ්ඩුවට එරෙහිව පෙලගස්වන බව උපාධිධාරී ජාතික මධ්‍යස්ථානයේ කැඳවුම්කරු චන්දන සූරියආරච්චි  මහතා පැවැසීය.

මැතිවරණ වාසි ලබාගැනීම සඳහා ආණ්ඩුව උපාධිධාරීන් යොදාගැනීම උපාධිධාරී ජාතික මධ්‍යස්ථානය තරයේ හෙළා දකින බවද ඔහු සඳහන් කළේය.

මරදාන සමාජය හා සාමයික කේන්ද්‍රයේ අද (04) පැවති මාධ්‍ය හමුවකට එක්වෙමින්  ඔහු මේ බව පැවැසීය.

එහිදී වැඩිදුරටත් අදහස් දැක්වූ චන්දන සූරියආරච්චි  මහතා මෙසේද කීය.  

 “මේ ආණ්ඩුව සියලුම උපාධිධාරීන්ට රැකියා ලබාදෙන බවට ජනාධිපතිවරණයේදී පොරොන්දුවක් ලබාදුන්නා. ආණ්ඩුව යළිත් මහමැතිවරණයේදී උපාධිධාරින් රැවටීමට උත්සාහ ගනිමින් සිටිනවා. ආණ්ඩුවේ මෙම උත්සාහය උපාධිධාරී ජාතික මධ්‍යස්ථානය තරයේ හෙළා දකිනවා.

සද්භාවයෙන් මේ රැකියා ලබාදුන්නනම් මාර්තු වෙනකම් ඉන්නේ නැතුව එයට පෙර මේ ගැන පියවරක් ගැනීමට ආණ්ඩුවට අවස්ථාව තිබුණා. දැන් ආණ්ඩුව විසුරුවනවිට උපාධිධාරීන් පිරිසකට පමණක් රැකියා ලබාදීමට ආණ්ඩුව කටයුතු කරලා තියෙනවා.

මැතිවරණ  නීතිමය තත්ත්වයන් යටතේ මෙම පත්වීම් අත්හිටුවීමට මැතිවරණ කොමිසම පියවර ගෙන තිබෙනවා. මෙවැනි තීරණයක් ගැනීම පිළිබඳව පූර්ව අවබෝධයක් සහිතව ආණ්ඩුව හිතාමතා කටයුතු කරමින් රැකියා විරහිත උපාධිධාරීන් රැවටීමට කටයුතු කර තිබෙනවා.

70,000 ක අයදුම්කරුවන් අතරින් 56,000ක් උපාධිධාරීන් මේ රැකියා ලබාදීමට සුදුසුකම් ලබා දී ඇති බව ආණ්ඩුව පැවසුවා.  ඉන් 45,588කට රැකියා ලබාදෙන බවට ආණ්ඩුව පැවසුවා. මේ රැකියා ලබාදෙන ආකාරය ආණ්ඩුව පැහැදිලි කර නැහැ. අප්‍රේල් 25 න් පසු කොයි ආණ්ඩුව පත්වුනත් මේ 56,000 ටම රැකියා හිමිවිය යුතුයි” යැයිද ඔහු එහිදී පැවැසීය.