හර්ෂණ තුෂාර සිල්වා, තරිඳු ජයවර්ධන 
 
 
නව ආණ්ඩුවේ කැබිනට් අමාත්‍යධුර සංඛ්‍යාව 30කට අඩු වනු ඇතැයි පාර්ලිමේන්තු මන්ත්‍රී දිනේෂ් ගුණවර්ධන මහතා පැවැසීය.
 
අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් යුතු නව ආණ්ඩුවට පාර්ශව කිහිපයක්ම සම්බන්ධ බැවින් ඊට සියලු පක්ෂ හා පාර්ශව නියෝජනය වන පරිදි අමාත්‍යධුර පිරිනමන බවද ගුණවර්ධන මහතා කීය.
 
කොළඹ පදනම් ආයතනයේ මාධ්‍ය හමුව අවසානයේදී නව ආණ්ඩුව කැබිනට් අමාත්‍යධුර කීයකින් සමන්විත වේවි දැයි විමසූ ප්‍රශ්නයකට පිළිතුරු දෙමින් ගුණවර්ධන මහතා ඒ බව සඳහන් කළේය.
 
ඒ සම්බන්ධයෙන් තවදුරටත් අදහස් දැක්වූ පාර්ලිමේන්තු මන්ත්‍රී දිනේෂ් ගුණවර්ධන මහතා මෙසේ ද කීය.
 
“අපි යන්නේ කෙටි කාලයයි. පත්වන්නේ අන්තර්කාල ආණ්ඩුවක්. ඒ නිසා කැබිනට් අමාත්‍යධුර සංඛ්‍යාව 30ටත් වඩා අඩු වෙනවා. කැබිනට් මණ්ඩලයත්, නියෝජ්‍ය අමාත්‍යවරුත් සමඟ සියල්ල 60ත් 70ත් වේවි. ඇතැම් විටෙක  එය ඊටත් අඩු වේවි. ඒ වගේම පාර්ශව කිහිපයක් සිටිනවා. ඒ සියලු දෙනා නියෝජනය විය යුතුයි. ඒ නිසා සියලු පාර්ශව නියෝජනය වන පරිදි අමාත්‍යධුර පිරිනැමීම කෙරෙහි සළකා බලා තිබෙනවා” යැයි ගුණවර්ධන මහතා තවදුරටත් කීවේය.