අයිවරි කොස්ට් හි අග්‍රාමාත්‍යවරයා ජර්මනියේ රෝහලකදී මියගිය බව එරට රජය නිවේදනය කර තිබේ. හමෙඩ් බකයෝකෝ මහතා මියයන විට පිළිකා රෝගයට ප්‍රථිකාර ලබමින් සිටියේය. සිය 56 වන උපන්දිනය සැමරීමට දින කිහිපයක් තිබියදී ඔහු අභාවප්‍රාප්ත විය.

මීට පෙර අයිවරි කෝස්ට් හි අග්‍රාමාත්‍යවරයා ලෙස කටයුතු කළ අමදු ගොන් කුලිබාලිගේ හදිසි අභාවයෙන් පසු පසුගිය වසරේ ජුනි මාසයේ බකයෝකෝ  මහතා අග්‍රාමාත්‍ය ධූරයට පත්විය. වෛද්‍ය පරීක්ෂණ සඳහා පෙබරවාරි මාසයේ දී බකයොකෝ මහතා ප්‍රංශයට ගෙනයන ලද අතර පසුව ඔහුගේ සෞඛ්‍ය තත්ත්වය පිරිහීම හේතුවෙන් ජර්මනියට මාරු කරන ලදී.

මාධ්‍ය ප්‍රධානියෙකු ලෙස කටයුතු කළ හෙතෙම පසුව දේශපාලනට පිවිසි අතර අග්‍රාමාත්‍ය ලෙස පත්වීමෙන් අනතුරුව අයිවරි කෝස්ට් හි සිවිල් යුද්ධයේ ප්‍රමුඛ මැදිහත්වීමේ කාර්යභාරයක් ඉටු කළේය.

"බකයොකෝ, දේශපාලන ක්‍රීඩාවේ ප්‍රධාන ක්‍රීඩකයෙක් සහ ප්‍රතිසංවිධානයේ ප්‍රධාන මෙහෙයුම්කරුවෙකි. එසේම ශ්‍රේෂ්ඨ රාජ්‍යතාන්ත්‍රකයෙක් සහ පක්ෂපාතී මිනිසෙකු ලෙස සැමට ආදර්ශයක් වෙමින් ජීවත් වූ මිනිසෙකි." යනුවෙන් අයිවරි කෝස්ටි හි ජනපති ඇලසෙන් ඔවාටාරා මහතා පැවසීය. 

අග්‍රාමාත්‍යවරයාගේ භූමිකාව හැරුණු විට රටේ ආරක්ෂක අමාත්‍යවරයා ලෙස ද බකයොකෝ මහතා කටයුතු කළේය.

බකයොකෝ මහතාගේ අභාවයෙන් පසු අයිවරි කෝස්ට් හි අතුරු අග්‍රාමාත්‍යවරයකු පත්කර ඇති අතර ජනාධිපතිවරයාගේ බාල සොහොයුරා අතුරු ආරක්ෂක ඇමැති ලෙස නම්කර තිබේ.

අයිවරි කෝස්ට්, අප්‍රිකාවේ බටහිර වෙරළ ආසන්නයේ  පිහිටා ඇති රටකි.

 

(බීබීසී ඇසුරිණි - 085)