තරිඳු ජයවර්ධන

ඩුබායිහි දී අත්අඩංගුවට ගත් මාකඳුරේ මදූෂ්, ගායක අමල් පෙරේරා සහ ඔහුගේ පුත් නදීමාල් පෙරේරා ඇතුළු පිරිස තවදුරටත් බර් ඩුබායි පොලිසියේ රඳවාගෙන සිටින බව එරට ආරංචි මාර්ග කියයි.

ගායක අමල් පෙරේරා සහ ඔහුගේ පුත් නදීමාල් පෙරේරා වෙනුවෙන් ඉදිරිපත්වන නීතීඥවරුන් හෙට උදෑසන බර් ඩුබායි පොලිසියේ නීති නිලධාරී මොහොමඩ් අල් නක්බි මහතා හමුවී කරුණු දැක්වීමට නියමිත බවත්, ඒ සඳහා එම නිලධාරියා කාලය වෙන්කරගෙන ඇති බවත් එම ආරංචි මාර්ග සඳහන් කරයි.

අමල් පෙරේරා මහතාගේ පුත් නදීමාල් පෙරේරා නිදහස් කළ බවට පැතිර යන කතාවේ කිසිදු සත්‍යතාවක් නැතැයි ද, ඔහු ඇතුළු 31 දෙනෙකු තවදුරටත් රඳවා තබාගෙන ඇතැයි ද එම ආරංචි මාර්ග පවසයි.

ඔවුන් අධිකරණයට ඉදිරිපත් කරන දිනයක් මේ වන තෙක් නිල වශයෙන් දැනුම් දී නැත. කෙසේ වෙතත් ඔවුන් සම්බන්ධ විමර්ශන මේ වන විට අවසන්ව පවතී. මනසට හා හැඟීම්වලට බලපෑම් කළ හැකි ද්‍රව්‍ය භාවිතය සම්බන්ධයෙන් එතැන සිටින කිහිප දෙනකුට චෝදනා එල්ල වනු ඇතැයි දැනගන්නට තිබේ.

අමල් පෙරේරා සහ නදීමාල් පෙරේරා වෙනුවෙන් පෙනී සිටීමට ඔවුන්ගේ ඥාතීන්ගෙන් ඇටෝර්නි බලපත්‍ර සහ ප්‍රොක්සි අත්සන් කරගෙන එය ශ්‍රී ලංකාවේ ඩුබායි තානාපති කාර්යාලයෙන් සහතික කරගෙන ඇති බවත්, ඒ අනුව තමාට සහ නීතීඥ ශාබ්දික වෙල්ලප්පුලි මහතාට ගායකයන් දෙපළ වෙනුවෙන් පෙනී සිටීමට අවස්ථාව ඇති බවත් නීතීඥ උදුල් පේමරත්න මහතා පැවසීය.