(නාලක සංජීව දහනායක)

මහා මැතිවරණයට තරග කිරීම සම්බන්ධයෙන් ශ්‍රී ලංකා පොදුජන පෙරමුණ සහ ශ්‍රී ලංකා නිදහස් පක්‍ෂය අතර ඇතිව තිබෙන මතභේදාත්මක කරුණු නිරාකරණය කර ගැනීම සඳහා වන සාකච්ඡාවක් අග්‍රාමාත්‍ය මහින්ද රාජපක්‍ෂ සහ හිටපු ජනාධිපති මෛත්‍රීපාල සිරිසේන යන මහත්වරුන්ගේ ප්‍රධානත්වයෙන් හෙට (18) අරලියගහ මන්දිරයේදී පැවැත්වේ.

මෙම සාකච්ඡාව සඳහා ශ්‍රී ලංකා පොදුජන පෙරමුණ නියෝජනය කරමින් එහි ජාතික සංවිධායක බැසිල් රාජපක්‍ෂ, අධ්‍යාපන අමාත්‍ය ඩලස් අලහප්පෙරුම සහ සංචාරක අමාත්‍ය ප්‍රසන්න රණතුංග මහත්වරුන් සහභාගි වීමට නියමිත අතර ශ්‍රී ලංකා නිදහස් පෙරමුණ නියෝජනය කරමින් එහි මහලේකම් රාජ්‍ය අමාත්‍ය දයාසිරි ජයසේකර, අමාත්‍යවරුන්වන නිමල් සිරිපාල ද සිල්වා හා මහින්ද අමරවීර මහත්වරුන් සහභාගී වීමට නියමිතව ඇත.

එමෙන්ම ජනාධිපති ගෝඨාභය රාජපක්‍ෂ මහතාගේ හා අග්‍රාමාත්‍ය මහින්ද රාජපක්‍ෂ මහතාගේ ප්‍රධානත්වයෙන් ආණ්ඩු පක්‍ෂයේ විශේෂ මන්ත්‍රී කණ්ඩායම් රැස්වීමක් හෙට පස්වරුවේදී අරලියගහ මන්දිරයේදී ද පැවැත්වීමට නියමිතව තිබේ.

පාර්ලිමේන්තුව විසුරුවා හැර මහා මැතිවරණය පැවැත්වීම සම්බන්ධයෙන් ආණ්ඩුපක්‍ෂයේ මන්ත්‍රීවරුන්ගෙන් මෙහිදී අදහස් විමසීමට නියමිතව ඇතැයි එම පක්‍ෂයේ ආරංචිමාර්ග සඳහන් කරයි.