(පී.එම්. රාජපක්ෂ)

මහනුවර ශ්‍රී දළදා මාලිගාව  වාර්ෂිකව පවත්වනු ලබන සතර මහා මංගල්‍යයන්ගෙන් එකක් වන අලුත් සහල් මංගල්‍යය  දුරුතු පුන් පොහෝ දිනය යෙදුණු අද (28)  ශ්‍රී දළදා මාලිගාවේදී සිදුකෙරිණි.

අලුත් සහලින් පිසූ කිරිබත් දළදා සමිඳුන් අභියස දී පූජා කිරීමෙන් ගොවිතැන් කටයුතු සශ්‍රික වී රටට සෞභාග්‍ය උදාවේවායි ප්‍රාර්ථනා කිරීම අලුත් සහල් මංග්‍යය පැවත්වීමේ අරමුණ වේ.

මෙම පූජාව වෙනුවෙන් කෙත් වතුවලින් නෙළා ගත් සාරවත් වී අස්වැන්නේ සහලේ අග්‍ර කොටස  ශ්‍රී  දළදා  මාලිගාව  හා  සිව්  මහා දේවාලවල කොටස් ලෙස වෙන් කිරීම පුරාතන සිරිත් සම්මත චාරිත්‍රවලට අනුව කුණ්ඩසාලේ, පල්ලේකැලේ පිහිටි ශ්‍රී දළදා මාලිගාවේ වී අටුව අසළ දී සිදු කෙරිණි.

ඉන්පසු වී අටුවේ සිට ශ්‍රී දළදා මාලිගාව වෙත  ඇතුන් පිරිවරා ගත් පෙරහරින් සහල් රැගෙන ඒම සිදු කෙරිණි.

අස්ගිරි මල්වතු මහනාහිමියන්ගේ අනුශාසනා පරිදි තේවාව භාරව කටයුතු කරන මහා සංඝරත්නය සහ මහනුවර ශ්‍රී දළදා මාලිගාවේ දියවඩන නිලමේ ප්‍රදීප් නිලංග දෑල මහතාගේ සහභාගීත්වයෙන් කාරියකරවන කෝරාළ ඇතුළු සෙසු රාජකාරි නිරතවන්නන් අතින් මේ පුරාතන චාරිත්‍රය මෙවරත් ඉටු කෙරිණී.