අඛණ්ඩව හත්වැනි දිනටත් ඉන්දියාවෙන් පැය 24ක් ඇතුළත වාර්තා වූ කොරෝනා ආසාදිතයන්ගේ සංඛ්‍යාව අද (26) 6 000 ඉක්මවූ අතර එම සංඛ්‍යාව 6,535ක් ලෙස දැක්විණි.
 
ඉන්දියාවෙන් ඊයේ (25) වැනිදා කොරෝනා ආසාදිතයන් 6,977 දෙනකු හඳුනාගෙන තිබූ අතර අද (26) දිනයේදී ආසාදිතයන් 6,535 දෙනකු හඳුනාගත් බව එන්.ඩී.ටීවී. පුවත් සේවය වාර්තා කර තිබිණි.

ඉන්දියාවෙන් මැයි මස (21) වැනිදා සිට දෛනිකව වාර්තා වූ කොරෝනා ආසාදිතයන්ගේ ගණන 6,000 ඉක්මවීය.
 
ඉන්දියාවෙන් අවසන් පැය 24ක කාලයේදී කොරෝනා ආසාදිත මරණ 146ක් වාර්තා වූ අතර ඒ අනුව එරටින් අද (26) පස්වරු 2 වනවිට වාර්තා වූ කොරෝනා ආසාදිත සමස්ත මරණ ගණන 4,167ක් ලෙස දැක්විණි.
 
ඉන්දියාවෙන් අද (26) පස්වරු 2 වනවිට වාර්තා වූ කොරෝනා ආසාදිතයන්ගේ සමස්ත ගණන 1,45,380ක් වූ අතර සුවය ලබා පිට වී ගිය සංඛ්‍යාව 60,491ක් විය. කොරෝනා වයිරසය ආසාදනය වී ඉන්දියාවේ විවිධ රෝහල්වල ප්‍රතිකාර ලබන ගණන 80,722කි.

කොරෝනා වයිරසය ආසාදනය වී සුවය ලබා පිටව යන පිරිස ප්‍රතිශතයක් ලෙස සියයට 40 ඉක්මවා ඇතැයි ඉන්දීය සෞඛ්‍ය බලධාරීහු ඊයේ ප්‍රකාශ කළහ.

කොරෝනා ආසාදිතයන්ගේ පනස් දහස ඉක්මවූ පළමු ප්‍රාන්තය බවට මහාරාෂ්ට්‍ර ප්‍රාන්තය පත්ව ඇති අතර එම ප්‍රාන්තයෙන් අද (26) පස්වරු 2 වනවිට වාර්තා වූ ආසාදිතයන්ගේ ගණන 52,667ක් විය.

ඉන්දියාවෙන් අද දිනයේදී වාර්තා වූ ආසාදිතයන්ගෙන් වැඩිම පිරිසක් වාර්තා වූයේ මහාරාෂ්ට්‍ර සහ ගුජරාට් යන ප්‍රාන්තවලිනි. ඉන්දියාවේ මූල්‍ය අගනගරය හෙවත් මූල්‍ය කේන්ද්‍රස්ථානය වන මුම්බායි නුවර පිහිටා ඇත්තේ මහාරාෂ්ට්‍ර ප්‍රාන්තයේ ය. ගුජරාට් යානු ඉන්දීය අග්‍රාමාත්‍ය නරේන්ද්‍ර මෝදිගේ ප්‍රාන්තය යි.
 
අල්ජසීරා/එන්.ඩී.ටීවී.
 
055