( තිළිණි ද සිල්වා )

රුමේනියාවේ ඇගළුම් කර්මාන්ත ශාලාවක සේවය කරන ශ්‍රී ලාංකිකයින් 7 දෙනෙකුට කොරෝනා වයිරසය  ආසාදනය වී ඇති බවත්  , එම වයිරස පැතරීයාමේ අවදානම හේතුවෙන්  එම හත්දෙනා ඇතුළු එහි  සේවය කරන තවත් ලාංකිකයින් 44 දෙනෙකු කම්හලේ රැකියා වලින් ඉවත් කිරීමේ සිද්ධියක්  එරට තානාපති ආරංචි මාර්ග සදහන් කර සිටී.
 
රුමේනියාවේ බොටොසානි ප්‍රදේශයේ පිහිටි ඇගලුම් කම්හලක සේවය කරන ශ්‍රී ලාංකිකයින් 7 දෙනෙකුට මෙලෙස වයිරසය ආසාදනය වී ඇති බව  පැවසේ.
 
ඇගලුම් කම්හ‍ලේ සේවය කළ ශ්‍රී ලාංකිකයින් 44 දෙනෙකු සේවයෙන් ඉවත් කර ඇති අතර එලෙස ඉවත් කළ පිරිසෙන් 7 දෙනෙකුට මෙම වයිරස ආසාදනය වී ඇති බවද සදහන්වේ.
 
සේවයට වාර්තා නොකිරීමේ චෝදනාව මත අදාල සේවකයින් සිය ආයතනයෙන් ඉවත් කර ඇති බව ඇගලුම් කම්හලේ බලධාරීන් ප්‍රකාශ කළ බවද තානාපති ආරංචි මාර්ග වැඩිදුරටත් සදහන් කරයි.
 
රුමේනියාව තුළ පැතිර යන කොරෝනා වයිරසය ව්‍යාප්තියට බියෙන් අදාල ශ්‍රී ලාංකිකයින් පිරිස සේවයට වාර්තා කර නොමැති බව කම්හල් නිලධාරීන් සදහන් කර ඇතැයිද එම ආරංචි මාර්ග වලින් වැඩිදුරටත් පැවසේ.
 
කෙසේවෙතත් එම ලාංකික 44 දෙනා සේවයෙන් ඉවත් කිරීම සම්බන්ධයෙන් එරට දේශීය කම්කරු පරීක්ෂක කාර්යාලය විසින් විමර්ශනයක් ද ආරම්භ කර ඇති බව සදහන් වේ.
 
ශ්‍රී ලාංකික සේවකයින්ට ද රුමේනියානු ජාතිකයින්ට හා සමාන අයිතිවාසිකම් ඇති බැවින් සේවයෙන් ඉවත් කිරීම පිළිබදව විධිමත් පරීක්ෂණයක් සිදුකරන බව රුමේනියානු කම්කරු පරීක්ෂක කාර්යාලය සඳහන් කරන බවද රූමේනියා තානාපති ආරංචි මාර්ග සදහන් කර සිටී.