( තිළිණි ද සිල්වා )

එතෙර සිටින ශ්‍රී ලාංකිකයින් 27,000 කට අධික සංඛ්‍යාවක් ආපසු ශ්‍රී ලංකාවට පැමිණීමේ කැමැත්තෙන් පසුවන බව විදේශ අමාත්‍යාංශ ලේකම් රවිනාථ ආර්යසිංහ මහතා අද (26) පැවසීය.
 
මෙම පිරිසට ලාංකික ශ්‍රමිකයන් හා යැපෙන්නන් 17,000 කට අධික සංඛ්‍යාවක් ද, සිසු සිසුවියන් 6,000 ක් සහ කෙටිකාලීන වීසා බලපත්‍ර දරන්නන් හා සංචාරකයින් 3,000 ක් පමණ ද ඇතුළත් වන බවද විදේශ අමාත්‍යාංශ ලේකම්වරයා වැඩිදුරටත් කියා සිටියේය.

විදේශ සබදතා අමාත්‍යාංශය යටතේ පිහිටවු " කන්ටෑක්ට් ශ්‍රී ලංකා නැමැති සජීවි අන්තර්ජාල ප්‍රවේශය  සහප වෙනත් මාධ්‍යයන් හරහා මෙම පිරිස් යළි දිවයිනට පැමණීමට කැමැත්තෙන් සිටින බවට දන්වා ඇතැයිද විදේශ අමාත්‍යාංශ ලේකම්වරයා පෙන්වා දෙයි. 

මෙම පිරිස් නැවත දිවයිනට ගෙන්වීමේදී රජයේ අවධානය මේ වන විට යොමු වී ඇත්තේ ශිෂ්‍යයන් සහ රජයේ පුහුණු වැඩසටහන් සඳහා දකුණු ආසියා රටවලට ගොස් සිටින අය කෙරෙහි බව ලේකම් ආර්යසිංහ මහතා  පැවසීය. 

ඉන්පසුව වෙනත් රටවල වර්ධනය  වෙමින් පවතින මෙවැනිම තත්වයන් පිළිබඳව විදේශ සබඳතා අමාත්‍යාංශය විසින් සමීපව අධීක්‍ෂණය කරනු ලබන අතර, නැවත සියරට පැමිණවීම සඳහා තීරණ ගැනීම සහ පහසුකම් සැපයීමට ප්‍රතිපත්ති සම්පාදකයින්ගේ සලකා බැලීම සඳහා සුදුසු නිර්දේශ ලබා දෙන බවද විදේශ ලේකම්වරයා වැඩිදුරටත් කියා සිටියේය.

පීඩාවට පත්ව සිටින එතෙර ලාංකිකයින් ගෙන්වීමේ ක්‍රියාවලිය විදේශ සබදතා අමාත්‍යාංශයේ සම්බන්ධීකරණය යටතේ ඒ ඒ රටවල පිහිටි ශ්‍රී ලංකා දූත මණ්ඩල හා කොවිඩ්-19 කාර්ය සාධක බලකාය සහ තවත් ජාතික ආයතන රාශියක් සමඟ සහයෝගයෙන් ක්‍රියාත්මක කෙරෙන බවද හෙතෙම වැඩිදුරටත් කීය.
 
බොහෝ අවස්ථාවල දී, එතෙර සිටින ශ්‍රී ලාංකික සංක්‍රමණික ශ්‍රමිකයන් මුහුණ දෙන අවදානම අවම කිරීමට ශ්‍රී ලංකා දූත මණ්ඩලවලට හැකි වූ බවත් ,සංක්‍රමණිකයන් පිළිබඳ ජාත්‍යන්තර සංවිධානය (IOM), කැරිටාස් සහ රතු කුරුස වැනි ජාත්‍යන්තර සංවිධාන විසින් සපයනු ලබන ආධාර එම දූත මණ්ඩලවල කාර්යයන්  වැඩිදියුණු කිරීමට ඉවහල් වූ බව විදේශ අමාත්‍යාංශය කියා සිටී.