කොරෝනා වයිරසයෙන්  අප්‍රිකාව පුරා වසරක් තුළ 190 000ක ජනතාවක් මිය යා හැකි බවට ලෝක සෞඛ්‍ය සංවිධානය අනතුරු අඟවයි. 

අප්‍රිකානු රටවල වසංගතය වසර කිහිපයක් පවතිනු ඇති බවට ද නව සමීක්ෂණයකින් අනුමාන කර තිබේ.
 
සමීක්ෂණයෙන් පැවසෙන්නේ අප්‍රිකාවේ මිලියන 29 - 44ත් අතර ජනතාවක් පළමු වසර තුළදී ආසාදනය වියහැකි බවයි.
 
එම කාලය තුළ 83 000 - 190 000 ත් අතර පිරිසක් මිය යා හැකි බවද එය අනතුරු අඟවයි.
අප්‍රිකානු කළාපයේ රටවල් 47ක් සම්බන්දව මෙම සමීක්ෂණයේදී අවධානය යොමුකර තිබේ.

කළාපයේ රජයන් විසින් ඉක්මන් ක්‍රියාමාර්ග අනුගමනය නොකළහොත් ඉදිරි වසර කිහිපය තුළ, ජීවිත බිලිගැනීම කෙරෙහි කොවිඩ් - 19  සිදුකරන බලපෑම වැඩි වනු ඇතැයි ලෝක සෞඛය සංවිධානය වැඩිදුරටත් සඳහන් කරයි.අප්‍රිකාවේ වඩාත් ජනාකීර්ණ රටවල් වන නයිජීරියාව, දකුණු අප්‍රිකාව සහ අයිවරි කෝස්ට් ඇතුළු රටවල් කිහිපයක් ඔවුන්ගේ අගුලු දැමීමේ පියවරයන් ලිහිල් කිරීමට පටන් ගැනීමත් සමග ලෝක සෞඛ්‍ය සංවිධානය මෙම අනතුරු ඇඟවීම සිදුකර තිබේ.

"පරීක්ෂා කිරීම, ආසාදිතයන් ලුහුබැඳ යාම, නිරෝධායනය කිරීම සහ ප්‍රතිකාර කිරීම කෙරෙහි වැඩි වැඩියෙන් අවධානය යොමු කළ යුතුයි." යැයි ඔවුහු පවසති.
 
අප්‍රිකානු මහාද්වීපය පුරා මේ වනවිට කොරෝනා මරණ 2 000කට වඩා සිදුවී ඇති බව අප්‍රිකානු රෝග පාලන මධ්‍යස්ථානය පවසයි.

ලෙසෝතෝ හැර සෑම අප්‍රිකානු රටකම ආසාදිතයන් වාර්තා වී තිබේ.

දකුණු අප්‍රිකාවෙන් වැඩිම රෝගීන් සංඛ්‍යාවක් වාර්තා වන අතර එය 8 200කි. මරණ 160ක් සිදුවී තිබේ.

වැඩිම මරණ සංඛ්‍යාව වන 483ක් ඇල්ජීරියාවෙන් වාර්තා වේ.
 
(බීබීසී ඇසුරිණි - 085)