(ඩයනා උදයංගනී)

කොරෝනා වසංගත තත්ත්වය හේතුවෙන් පීඩාවට පත්වූ 51,44,046 දෙනකු වෙත රුපියල් 5,000 දීමනාව ලබාදීම සදහා මැයි මාසය වෙනුවෙන් රුපියල් කෝටි 2,572ක් වෙන් කර ඇතැයි කැබිනට් ප‍්‍රකාශක, තොරතුරු හා සන්නිවේදන තාක්‍ෂණ, උසස් අධ්‍යාපන, තාක්‍ෂණ හා නවෝත්පාදන අමාත්‍ය, ආචාර්ය බන්දුල ගුණවර්ධන මහතා පැවසීය.

මෙම මුදල වෙන්කර ගැනීම සදහා සෞඛ්‍ය, දේශීය වෛද්‍ය සේවා, කාන්තා හා ළමා කටයුතු සහ සමාජ ආරක්‍ෂණ ඇමතිනී පවිත‍්‍රා වන්නිආරච්චි මහත්මිය ඉදිරිපත් කළ යෝජනාවකට අමාත්‍ය මණ්ඩල අනුමැතිය හිමිවූ බව ද අමාත්‍යවරයා සදහන් කළේය.

අප්‍රේල් මාසයේදී ලක්‍ෂ 74 ක පිරිසක් වෙත මෙම දීමනාව ලබාදී තිබෙන බව ද අමාත්‍ය බන්දුල ගුණවර්ධන මහතා කීවේය.

අමාත්‍යවරයා මේ බව පැවසුවේ රජයේ ප‍්‍රවෘත්ති දෙපාර්තමේන්තුවේදී අද (14) පැවති කැබිනට් තීරණ දැනුම්දීමේ මාධ්‍ය හමුව අමතමිනි.

මෙසේ සහනාධාර ලබාදීමේදී වැඩිහිටි දීමනාව ලබන්නන් සහ මෙතෙක් නොලැබී පොරොත්තු ලේඛනවල සිටි 6,29,214 කට රුපියල් කෝටි 314ක්, අවුරුදු 100 ඉක්මවූ වැඩිහිටියන් 489කට රුපියල් ලක්‍ෂ 20ක්, ආබාධිත තත්ත්වයේ පසුවන 1,23,641 දෙනකු වෙනුවෙන් රුපියල් කෝටි 62ක්, වකුගඩු රෝගීන් 44,291 ක් වෙනුවෙන් රුපියල් කෝටි 22 ක්, සමෘද්ධිලාභීන් 17,98,293ක් වෙනුවෙන් රුපියල් මිලියන 899ක්, සමෘද්ධි සහනාධාරය ලබාගැනීමේ පොරොත්තු ලේඛනවල සිටින 7,31,975 ක් වෙනුවෙන් රුපියල් කෝටි 366ක්,අඩුආදායම්ලාභී හා ජීවනෝපාය අහිමි පවුල් 19,24,967 වෙනුවෙන් රුපියල් කෝටි 962 ක්, අගමැතිතුමා වෙත අභියාචනා ඉදිරිපත් කළ ප‍්‍රතිලාභීන්ට ඇතුළු 71,383කට රුපියල් කෝටි 35ක්, අග‍්‍රාමාත්‍ය ලේකම් කාර්යාලය චක‍්‍රලේඛය අනුව සහනාධාර සුදුසුකම ලැබූ 6,88,811 කට රුපියල් කෝටි 344 ක් වෙන් කර තිබෙන බව ද අමාත්‍ය බන්දුල ගුණවර්ධන මහතා පැවසීය.

මෙම සියලූ ගෙවීම් ඉදිරි සති දෙක තුළ සම්පූර්ණයෙන් ගෙවා අවසන් කිරීමට බලාපොරොත්තු වන බව ද ඇමතිවරයා සදහන් කළේය.

මෙරට ඇති වූ ව්‍යසනයකදී මෙතරම් සහනාධාර ප‍්‍රමාණයක් ලබාදුන්නේ ඉතිහාසයේ පළමු වරට බව ද ඇමතිවරයා වැඩිදුරටත් කියා සිටියේය.