බිමල් ශ්‍යාමන් ජයසිංහ 

බොරලැස්ගමුව විහාරස්ථානයක විහාරාධිපති හිමියන් ඇතුළු භික්ෂූන්  වහන්සේලා  විහාරස්ථානය තුළම  අද (21) ස්වයං නිරෝධනයට  ලක් කළ බව බොරලස්ගමුව සෞඛ්‍ය නිලධාරී කාර්යාලය වැඩ බලන පරිපාලන  මහජන සෞඛ්‍ය පරීක්ෂක එච්.ඒ.කේ. විජේසූරිය මහතා පැවසීය.

බොරලැස්ගමුව  රත්තනපිටිය විශ්ව විද්‍යාල පාර ප්‍රදේශයෙන් හමු වූ කොරෝනා ආසාදිතයාගේ පවුලේ අය නිවස ආසන්නයේ පිහිටා ඇති විහාරස්ථානයට දහවල් දානය පිරිනමා ඇති බව අනාවරණය වීම හේතුවෙන් පන්සලේ භික්ෂූන් වහන්සේලා මෙලෙස නිරෝධායනය කර තිබේ.

වයස අවුරුදු 56 වන එම එම පුද්ගලයා උණ සහ සෙම්ප්‍රතිශ්‍යාව සෑදීම හේතුවෙන් ඊයේ  20 ශ්‍රී ජයවර්ධන රෝහලට  ඇතුළත් කෙරිණි .

අනතුරුව සිදු කළ පී.සී.ආර්. පරීක්ෂණයේදී  ඔහු  කොරෝනා  ආසාදිතයකු  බවට තහවුරු වූ බව  විජේසූරිය මහතා පැවසීය.

එම අවස්ථාවේදී ආසාදිත රෝගියා රෝහලට ඇතුළත් කර රැගෙන ගිය ඔහුගේ පුත්‍රයා එම රෝහලට ද ඇතුළත් කළ බවත් ඔහුගෙන්  කිසිදු කොරෝනා ආසාදිත   රෝග ලක්ෂණ පෙන්නුම් නොකළ බවත් පරිපාලන මහජන සෞඛ්‍ය පරීක්ෂක වරයා පැවසීය .

රෝගියාගේ  බිරිඳ ද එම නිවස තුළම ස්වයං  නිරෝධනය ලක් කිරීමට අද දින  පියවර ගත් අතර එම නිවස සහ විහාරස්ථානය භූමිය  සහ අවට ප්‍රදේශ විෂබීජ හරණයට ලක් කළ බව  සෞඛ්‍ය වෛද්‍ය නිලධාරී කාර්යාලයේ ප්‍රකාශකයෙක් පැවසීය .