(විනීතා එම් ගමගේ)

කොවිඩ් 19 වයිරසය හදුනාගැනීම  සදහා රෝගීන් පරික්ෂා කෙරෙන පී සී ආර් පරික්ෂණය සම්බන්ධ වැරදි වාර්තා ලැබීම නිසා දහසක් පමණ සාම්පල් නැවත පරික්ෂා කිරීමට සිදුවූ බව සෞඛ්‍ය වෘත්තියවේදින්ගේ විද්වත් පර්ෂදයේ සභාපති රවි කුමුදේශ් මහතා ප‍්‍රකාශ කළේය.
 
රජයේ රසායනාගාර 11 ක් ඇති අතර ඒවායේ දිනකට පී සී ආර් පරික්ෂණ 2000 කට ආසන්න ප‍්‍රමාණයක් සිදුකළ හැකිව ඇතත් අවශ්‍ය තරම් නිදර්ශක ඒවාට ලැබෙන්නේ නැතැයි ද කුමුදේශ් මහතා කියා සිටියේය.
 
රජයේ රසායනාගාර තිබිය දී වෙනත් ස්ථානවලට පරික්ෂණ සදහා නිදර්ශක  ලබා දීමෙන් කොවිඞ් මර්දන වැඩසටහනට හානියක් සිදුවූ බව තම සංවිධානය කිහිප වරක් පෙන්වා දුන් බවත් ජනාධිපතිවරයාට පවා මේ සම්බන්ධව අට වතාවක් ලිපි මගින් පෙන්වා දුන් බවත් හෙතෙම සදහන් කළේය.
 
කෙසේ වෙතත් ජනාධිපතිවරයා වෙත යවන ලිපි අතරමග දී වෙනත් අයෙකු අතට පත්වන්නේ ද යන සැකය තම සංගමය සතුව ඇතැයි ද මෙම තත්ත්වයන් ගැන දේශපාලනික උවමනාවකින් කටයුතු කරන පිරිසක් සිටින්නේ ද යන සැකය ද පවතින බවත් කී කුමුදේශ් මහතා පවතින තත්ත්වය ගැන තමන් සතු රහස්‍ය වාර්තාවක් ජනාධිපතිවරයා වෙත භාරදීමට අවස්ථාවක් ලබාගැනීමට බලාපොරොත්තු වන බව ද ප‍්‍රකාශ කළේය.
 
අවදානම් පුද්ගලයින්ගේ පීසීආර් පරික්ෂණ රජේය රසායනාගාරවලට යැවීම නිසා වැරදි වාර්තා ලැබුණු අවස්ථා රැසක් ඇතැයි ද ජාතික රෝහලේ හෙද නිලධාරිනියකට කොරෝනා ආසාදිත වී ඇතැයි යන වාර්තාව කොළඹ විශ්ව විද්‍යාලයෙන් ලබාදී තිබු අවස්ථාවේ එවැනි කොරෝනා ආසාදිත යැයි වාර්තා ලැබුණු සිව්දෙනෙකු කොරෝනා ආසාදිත නොවූ බව යළිත් කළ පරික්ෂණවලින් හෙලිවූ බවද පැවැසීය.