ග්‍රීසියේ මලකාසා සරණාගත කඳවුරේ පුද්ගයෙකුට කොරෝනා ආසාදනය වී ඇතැයි තහවුරු වීමෙන් පසු එම කඳවුර සම්පූර්ණයෙන්ම නිරෝධායනය කිරීමට බලධාරීන් පියවර ගෙන තිබේ.
 
කොරෝනා ආසාදනය වූ පුද්ගලයා 53 හැවිරිදි ඇෆ්ගනිස්ථාන ජාතිකයෙකි.
 
මෙම පුද්ගලයා ඔහුගේ පවුලේ අය සහ තවත් සියගනනක් සංක්‍රමණිකයන් සමග කඳවුරේ වාසය කරයි.

කොරෝනා ආසාදනය වී ඇතැයි තහවුරු වීමෙන් පසුව ඔහු ඇතැන්ස් හි රෝහලකට මාරු කර යවා ඇත.
වයිරසය ඔහු වෙත පැමිණි මාර්ගය සහ ඔහු සබඳතා පැවැත්වූ පුද්ගලයන් සම්බන්දව දිගටම පරීක්ෂණ සිදුකරගෙන යන බව ග්‍රීසියේ මහජන සෞඛ්‍ය ඒජන්සිය පවසයි.
 
ඇතැන්ස් සිට කිලෝමීටර් 40ක් පමණ ඊසාන දිගින් පිහිටි මලකාසා කඳවුර සති දෙකක කාලයකට නීරෝධායනය සඳහා යොදවන බව සෞඛ්‍ය බලධාරීහු පවසති.
 
මෙය ග්‍රීසියේ ආසාදිතයන් වාර්තා වීම හේතුවෙන් නීරෝධායනය කළ  දෙවන කඳවුරයි.
මීට පෙර ආසාදිතයන් 20 දෙනකු වාර්තා වීම හේතුවෙන් ග්‍රීසියේ මධ්‍යම රිට්සෝනා කඳවුර අගුලු දැමීමට බලධාරීහු පියවර ගත්හ.
 
රෝග බෝවීම අවම කිරීම සඳහා මාර්තු 1 වනදායින් පසු පැමිණි සංක්‍රමණිකයින් සම්බන්දව විශේෂයෙන් සකස් කරන ලද පහසුකම් ක්‍රියාත්මක වූ බව එරට සෞඛ්‍ය අමාත්‍යාංශය පවසයි.
 
"සෑම කෙනෙකුම අවදානමට ලක්ව ඇත. ග්‍රීසියේ සංක්‍රමණිකයන් සරණාගතයින් වඩාත් අවදානමට ලක්වී ඇති කණ්ඩායමයි. ප්‍රධාන භූමියේ සහ දූපත් වල සංක්‍රමණිකයන් ඇතුළු සෑම කෙනෙකුටම සෞඛ්‍ය සේවා සඳහා සමාන පහසුකම් සහතික කිරීම අවශ්‍යයි. විශේෂයෙන් මෙවැනි වසංගතයක් පැතිරෙන අවස්ථාවක වැළැක්වීම, පරීක්ෂා කිරීම සහ ප්‍රතිකාර කිරීම ඇතුළු සේවාවලට සමාන ප්‍රවේශයක් ලබාදීම අවශ්‍යයි. මෙය මානුෂික පියවරක් පමණක් නොව ග්‍රිසියේ මහජන සෞඛ්‍ය සඳහා අත්‍යාවශ්‍ය කරුණකි" ග්‍රීසියේ සරණාගතයින් සම්බන්දව කටයුතු කරන ආයතනයක ප්‍රධානී ගියන්ලූකා රෝකෝ පැවසීය.
 
ග්‍රීසියේ මේ වනවිට කොරෝනා වයිරස රෝගීන් 1 673 ක් වාර්තා වී ඇති අතර මරණ 68ක් සිදුවී තිබේ.
පුද්ගලයන් 78 දෙනකු සුවය ලබා ඇත.
 
(රොයිටර් පුවත් ඇසුරිණි - 085)